Երևանի երկու արհեստագործական ուսումնարաններ կմիավորվեն՝ ձևավորելով Երևանի արհեստի պետական քոլեջ

Հայաստանի կառավարությունը նախաձեռնում է Երևանի թիվ 8 և թիվ 9 արհեստագործական պետական ուսումնարանների միաձուլումը, որի արդյունքում կձևավորվի «Երևանի արհեստի պետական քոլեջ» պետական ոչ առևտրային կազմակերպությունը:

«Արմենպրես»-ի հաղորդմամբ՝ նախագծով նախատեսվում է բարձրացնել արհեստագործական և միջին մասնագիտական ուսումնական հաստատությունների օպտիմալացման և կրթական գործընթացի արդյունավետությունը։

Միաձուլման հիմնական նպատակներն են՝ ուսումնական հաստատությունների օպտիմալացում, ինչը կնվազեցնի կառավարման ծախսերը, ուսման պայմանների բարելավում՝ վերանորոգված շենքային պայմաններով և նոր ուսումնական տեխնոլոգիաներով, աշխատաշուկայի պահանջներին համապատասխան մասնագիտությունների զարգացում և նորերի ներդրում, մասնագիտական կրթության բարելավում, որը կնպաստի որակյալ աշխատուժի ձևավորմանը։

Երևանի թիվ 8 արհեստագործական պետական ուսումնարանն այժմ գործում է Նոր Արեշ, Բուռնազյան 14 հասցեում, որտեղ սովորում է 349 ուսանող՝ 7 մասնագիտությամբ, իսկ Երևանի թիվ 9 արհեստագործական պետական ուսումնարանն աշխատում է Վարդաշեն 6-րդ փողոց, 66 հասցեում, որտեղ սովորում է 248 ուսանող՝ 10 մասնագիտությամբ։

Միաձուլման արդյունքում ուսումնարանները կգործեն մեկ կառույցի՝ «Երևանի արհեստի պետական քոլեջ»-ի ձևաչափով՝ հարմարեցված նոր պահանջներին և ուսումնական գործընթացի կազմակերպման բարելավված պայմաններով։
Ուսանողները կշարունակեն ուսումը առանց ընդհատումների, իսկ դասավանդման գործընթացը կանցնի արդիականացված ծրագրերով։

Նախագծի ընդունման դեպքում կբարձրացվի արհեստագործական կրթության արդյունավետությունը, կխնայվեն պետական միջոցներ՝ միևնույն մասնագիտությունների կրկնվող կրթական ծրագրերը համատեղելով, կբարելավվեն ուսման պայմանները՝ ապահովելով միջազգային չափանիշներին համապատասխանող քոլեջային համակարգ։

Այս փոփոխությունը ՀՀ կառավարության 2021-2026 թվականների ծրագրի մաս է և միտված է արհեստագործական և միջին մասնագիտական կրթության զարգացմանը՝ օպտիմալ կառավարման միջոցով։