1 րոպեի ընթերցում
«Երևանտրանս» ՓԲԸ-ի տարածքում տրանսպորտի կառավարման կենտրոնի վերակառուցման աշխատանքները 90 տոկոսով ավարտված են, մարտի վերջին ամբողջությամբ կավարտվեն:
«Արմենպրես»-ի հաղորդմամբ՝ այս մասին Երևանի քաղաքապետարանի գործակարգավարական խորհրդակցության ժամանակ զեկուցեց Շինարարության և բարեկարգման վարչության պետի ժամանակավոր պաշտոնակատար Անդրանիկ Թևոսյանը:
Երևանի քաղաքապետ Տիգրան Ավինյանը նշեց՝ առաջիկայում շրջայց կիրականացնի այն տարածքում, որտեղ կենտրոնացված է լինելու տրանսպորտային կենտրոնը:
«Մենք պլանավորում ենք այդ տարածքում կենտրոնացնել տրանսպորտային կառավարման կենտրոնը և համապատասխանաբար պետք է արձանագրենք նաև «Երևանտրանս» ընկերության գործառույթները, որը պետք է դառնա ՀՈԱԿ, որպեսզի այս տրամաբանական փոփոխությունները կարողանանք իրականացնել, որովհետև մասնավոր գծերն այլևս չկան: Բոլոր ուղևորափոխադրումները կազմակերպվում են Երևան քաղաքի ենթակա ընկերություններով: Հետևապես, «Երևանտրանս» ընկերության ֆունկցիան պետք է վերաձևավորել, և կազմակերպաիրավական ձևն էլ պետք է փոխվի, կարծում եմ, որ արդեն հին տրամաբանությամբ այս ընկերությունը չի կարող գործել»,-ասաց Ավինյանը:
