Հայաստանի որևէ ստրատեգիական ենթակառուցվածք չի կարող մնալ ուրիշին․ ՀՀ վարչապետը խոսել է սահմանազատման մասին

Սահմանազատման արդյունքում Հայաստանի որևէ ստրատեգիական ենթակառուցվածք չի կարող մնալ ուրիշին։ «Արմենպրես»-ի փոխանցմամբ՝ Հանրային հեռուստատեսությանը տված հարցազրույցում այս մասին հայտարարեց վարչապետ Նիկոլ Փաշինյանը։

«Մեր որևէ ստրատեգիական ենթակառուցվածք սահմանազատման արդյունքում չի կարող մնալ ուրիշին: Սահմանազատման իմաստն այն է, որ միջազգայնորեն ճանաչված դե յուրե սահմանները գծի վրա, հողի վրա արտահայտվեն: Սա գազատարագծում չէ, գազատարազատում չէ, սա սահմանազատում է: Մենք ունենք միջազգայնորեն ճանաչված սահման, որը պետք է գետնի վրա արտահայտվի և դա բխում է Հայաստանի Հանրապետության շահերից»,- նշեց Փաշինյանը։

Նա ընդգծեց՝ եթե, օրինակ, առաջանան իրադրություններ, երբ սահմանազատման հանձնաժողովները կհամարեն, որ ենթակառուցվածքների, մարդկանց կյանքի կազմակերպման համար անհրաժեշտ է տարածքներ փոխանակել, ապա դա հնարավոր կլինի անել միայն հանրաքվեի միջոցով: 

«Եթե սահմանազատման հանձնաժողովները կգան եզրակացության, կասենք՝ ժողովուրդ ջան, այս տարածքը դե յուրե մի երկրի տարածքում է, բայց սահմանազատման հանձնաժողովները եկել են ըմբռնման, որ կարելի է այս տարածքը փոխանակել այս տարածքի հետ։ Միանգամից ասեմ, որ հիմա այդպիսի թեմա չկա, չի քննարկվել ոչ մի անգամ, բայց եթե այդպիսի վիճակ ծագի ու Կառավարությունն ընդունելի համարի այն, ապա պետք է գա ժողովրդի մոտ, ասի՝ ժողովուրդ այսպիսի տարբերակ կա, գնա՞նք այս տարբերակով, թե՞ չգնանք: Ժողովուրդը կորոշի գնա՞նք, թե՞ չգնանք»,- հայտարարեց վարչապետը։