Թրամփը հնարավոր է համարում բարեկամական հարաբերությունների հաստատումը Չինաստանի և ՌԴ-ի, բայց ոչ Իրանի հետ
2 րոպեի ընթերցում
ԱՄՆ նախագահ Դոնալդ Թրամփը հայտարարել է, որ կարող է բարեկամական հարաբերություններ պահպանել Չինաստանի և Ռուսաստանի ղեկավարներ Սի Ծինփինի և Վլադիմիր Պուտինի հետ, իսկ Իրանի հետ հարաբերություններ հաստատելն ավելի դժվար է։ «Արմենպրես»-ի փոխանցմամբ՝ այս մասին նա ասել է Fox News-ին տված հարցազրույցում։
«Մենք նախկինում ևս շատ լավ հարաբերություններ ենք ունեցել Սի Ծինփինի հետ: Եվ Պուտինի հետ՝ նույնպես: Իրանը բոլորովին այլ հարց է: Այն շատ ուժեղ կապված է կրոնի հետ, և դա շատ վտանգավոր է», - ասել է Թրամփը։
Իսկ Սպիտակ տանը լրագրողների հետ զրույցում ԱՄՆ նախագահը հույս է հայտնել, որ Իրանի հետ կապված իրավիճակը կարող է կարգավորվել՝ առանց Թեհրանին ռազմական հարված հասցնելու։
«Հուսով եմ, որ դա կարելի է լուծել…. Իրանը, հուսով եմ, գործարքի կգնա», - ասել է Թրամփը՝ պատասխանելով հարցին, թե արդյոք նա կաջակցի Իրանի միջուկային օբյեկտներին հարվածներ հասցնելուն:
Ավելի վաղ The Financial Times-ը, հղում անելով աղբյուրների, հաղորդել էր, որ ԱՄՆ նոր վարչակազմը ցանկանում է Իրանում դիվանագիտության դիմել նախքան Թեհրանի վրա ճնշումը մեծացնելը։
Հրատարակության տվյալներով՝ Թրամփը պատրաստվում է Մերձավոր Արևելքի հարցերով հատուկ ներկայացուցիչ Սթիվ Ուիթքոֆին հանձնարարել քննարկել Իրանի հետ Վաշինգտոնի հարաբերությունները։
ԱՄՆ նախագահը նաև պլանավորում է կապեր պահպանել Հյուսիսային Կորեայի առաջնորդ Կիմ Չեն Ընի հետ։
«Ես կկապվեմ նրա հետ»,- ասել է նա՝ պատասխանելով լրագրողի համապատասխան հարցին։
Թրամփի խոսքով՝ 2017 թվականին իր պաշտոնն ստանձնելուց առաջ ԱՄՆ նախկին ղեկավար Բարաք Օբաման զգուշացրել է իրեն, որ Փհենյանը Վաշինգտոնի համար ամենալուրջ խնդիրն է։
«Ես լուծեցի այդ խնդիրը: Եվ ես համաձայնության եկա Կիմ Չեն Ընի հետ: Նա մոլի կրոնասեր չէ: Ընդհանրապես նա շատ խելացի մարդ է», - հավելել է Թրամփը: