«Լրագրողներ առանց սահմանների»-ն լրագրողներին հետապնդելու համար Բելառուսի նախագահի դեմ դատական հայց է ներկայացրել

«Լրագրողներ առանց սահմանների» կազմակերպությունը Միջազգային քրեական դատարան դատական հայց է ներկայացրել Բելառուսի նախագահ Ալեքսանդր Լուկաշենկոյի դեմ՝ մեղադրելով նրան լրագրողներին հետապնդելու համար: «Արմենպրես»-ի հաղորդմամբ՝ նրան մեղադրում են մարդկության դեմ հանցագործությունների մեջ, որոնք կապված են լրագրողների զանգվածային հետապնդումների հետ։ Այս մասին հաղորդագրություն է տարածել կազմակերպությունը։

«Լրագրողներ առանց սահմանների» կազմակերպությունը դիմել է դատարանի գլխավոր դատախազ Քարիմ Հանին՝ կոչ անելով հետաքննություն սկսել և մեղավորներին պատասխանատվության ենթարկել: 

Կազմակերպության տվյալներով՝ 2020 թվականից ի վեր Բելառուսում լրագրողները 589 անգամ ենթարկվել են ձերբակալությունների, իսկ այս պահին 43 լրագրող գտնվում է բանտում: Նրանց թվում է բելառուսական խոշորագույն լրատվական պորտալի՝ Tut.by-ի գլխավոր խմբագիր Մարինա Զոլոտովան, որի պորտալը ոչնչացվել է իշխանությունների ճնշումների հետևանքով։

Բացի այդ, ըստ «Լրագրողներ առանց սահմանների» և Բելառուսի լրագրողների ասոցիացիայի տվյալների, շուրջ 500-600 լրագրող ստիպված է եղել լքել երկիրը՝ անվտանգության և մասնագիտական գործունեության անհնարինության պատճառով:

Հայցը Միջազգային քրեական դատարանում ընդգծում է Բելառուսում լրագրողների դեմ հետապնդումների համակարգված բնույթը: Կազմակերպությունը հայտարարում է, որ Բելառուսի իշխանությունների գործողությունները նպատակ ունեն լրատվամիջոցների ազատությունը ճնշելու և լրագրողական գործունեությունը վերացնելու համար: