2 րոպեի ընթերցում
ԵՐԵՎԱՆ, 23 ԴԵԿՏԵՄԲԵՐԻ, ԱՐՄԵՆՊՐԵՍ: Ճապոնիայի պատվավոր կայսր Ակիհիտոն դեկտեմբերի 23-ին նշում է իր ծննդյան 91-ամյակը։ Ինչպես հաղորդել է Կայսեր արքունիքի վարչությունը, այդ առիթով նախատեսված է միջոցառում համեստ ձևաչափով և սակավաթիվ հյուրերով։ Այդ մասին «Արմենպրես»-ը տեղեկանում է ՏԱՍՍ գործակալությունից:
Կայսեր արքունիքի վարչության համաձայն՝ Ակիհիտոյի առողջական վիճակի մեջ լուրջ փոփոխություններ չկան։ Նրա մոտ նախկինում ախտորոշվել էր սրտի անբավարարություն, բայց բուժման շնորհիվ նրա վիճակը մնում է կայուն։
Վերջին ժամանակներս, նշել են վարչությունում, պատվավոր կայսրը վարում է հանդարտ և հանգիստ առօրյա կյանք՝ խնամելով իր տիկնոջը՝ պատվավոր կայսրուհի Միտիկոյին, որին հոկտեմբերին վիրահատել են՝ ընկնելու պատճառով ազդրոսկրի կոտրվածքից հետո:
Կայսրն ամեն օր թերթեր է կարդում՝ վերջին իրադարձություններին տեղյակ լինելու համար, իսկ ուտելիս հեռուստացույցով դիտում է լուրերը։
Բացի այդ, Ակիհիտոն շարունակում է գիտական գործունեությունը ձկնաբանության բնագավառում։ Ամեն երկուշաբթի և ուրբաթ կայսերական պալատի Կենսաբանական գիտահետազոտական ինստիտուտում նա զբաղվում է հետազոտությամբ։ Նա դրանով սկսել է հետաքրքրվել մանկուց։
Ակիհիտոն կայսերական գահն զբաղեցրել է 1989 թվականի հունվարի 7-ից մինչև 2019 թվականի ապրիլի 30-ը, երբ հոժարակամ վայր է դրել լիազորությունները զառամյալ տարիքի պատճառով։ 2019 թվականի մայիսի 1-ից Ճապոնիայի կայսր է դարձել նրա ավագ որդին՝ Նարուհիտոն: