Պատգամավոր Սոնա Ղազարյանն ուսանողների հետ հանդիպմանն անդրադարձել է ԵՄ-ի հետ վիզաների ազատականացման գործընթացին
1 րոպեի ընթերցում
ԵՐԵՎԱՆ, 19 ԴԵԿՏԵՄԲԵՐԻ, ԱՐՄԵՆՊՐԵՍ: ԱԺ «Քաղաքացիական պայմանագիր» խմբակցության պատգամավոր Սոնա Ղազարյանը դեկտեմբերի 19-ին հանդիպել է ԵՊՀ միջազգային ֆակուլտետի եւ Վ. Բրյուսովի անվան պետական համալսարանի տարբեր կուրսերի ուսանողների հետ:
«Արմենպրես»-ի հաղորդմամբ՝ ինչպես հայտնում են ԱԺ–ից՝ հանդիպման ընթացքում անդրադարձ է կատարվել Հայաստանի արտաքին քաղաքականության առաջնահերթություններին, միջխորհրդարանական միջազգային կառույցների հետ ԱԺ փոխգործակցությանը:
Պատգամավորը խոսել է Հայաստան-ԵՄ շրջանակում տարբեր ոլորտներում համագործակցության հեռանկարների, ԵՄ-ի հետ վիզաների ազատականացման գործընթացի մասին:
Սոնա Ղազարյանն անդրադարձել է նաեւ հայ-թուրքական հարաբերությունների հեռանկարին, Հայաստանի եւ Թուրքիայի միջեւ սահմանի բացմանը, Հայաստան-ԵԱՏՄ համագործակցությանը:
Հանդիպման մասնակիցները հետաքրքրվել են տարածաշրջանային անվտանգության հարցերով, ՀՀ կառավարության նախաձեռնած «Խաղաղության խաչմերուկ» ծրագրի հեռանկարներով:
Պատգամավորն անդրադարձել է օրենսդիր մարմնի գործառույթներին: