Կառավարությունը մշտադիտարկում է պարենային անվտանգության ռիսկերը և կառավարում իրավիճակը կանոնակարգված մոտեցմամբ. փոխվարչապետ
2 րոպեի ընթերցում
ԵՐԵՎԱՆ, 18 ԴԵԿՏԵՄԲԵՐԻ, ԱՐՄԵՆՊՐԵՍ։ Ներկայիս աշխարհը հայտնվել է ինստիտուցիոնալ լուծումների անարդյունավետության պայմաններում, ինչը մեծ ազդեցություն է ունենում ինչպես Հայաստանի, այնպես էլ տարածաշրջանի երկրների վրա։
«Արմենպրես»-ի հաղորդմամբ՝ «Մարտահրավերներ և հնարավորություններ՝ 2025-ին ընդառաջ» երկպանելային քննարկմանն այս մասին ասաց ՀՀ փոխվարչապետ Մհեր Գրիգորյանը։
Նա կարևորեց պարենային և էներգետիկ անվտանգության ռիսկերի կառավարումը։
«Մենք ուղղակի պարտավոր ենք հաշվի առնել պարենային անվտանգության ռիսկերը, էներգետիկ անվտանգության ռիսկերը և ըստ այդմ կառավարել և ձևավորել օրակարգեր, որոնք կրկին դժվար է ինստիտուցիոնալ դարձնել՝ փոփոխական իրավիճակի պայմաններում, որը մենք զգում ենք ամեն օր»,- նշեց նա։
Փոխվարչապետի խոսքով՝ գլոբալ փոփոխությունները ներառում են ապրանքների, աշխատուժի, կապիտալի և ծառայությունների շարժի վրա ազդող խնդիրները, ինչպես նաև պատժամիջոցների ռիսկերը, որոնք հաճախ դրսևորվում են ոչ համակարգված կերպով։
Գրիգորյանը նշեց, որ ՀՀ կառավարությունը մեկ տարվա ընթացքում մշտադիտարկման ներքո է պահում բոլոր ռիսկերը՝ մշակում իրավիճակային լուծումներ և կառավարում պաշարներն ավելի կանոնակարգված մոտեցմամբ։
«Մենք մեր գործառույթները ադապտացրել ենք այս իրավիճակին։ Մեկ տարի է, ինչ բոլոր ռիսկերը մոնիթորինգի տակ են, և մենք կայացնում ենք թե՛ իրավիճակային որոշումներ, թե՛ փորձում ենք կանոնակարգել պաշարների նկատմամբ առանձին մոտեցումը»,- ընդգծեց Գրիգորյանը։
Փոխվարչապետը նաև կարևորեց արտաքին առևտրի ասիմետրիկ իրավիճակի վրա ուշադրությունը՝ նշելով, որ այն անմիջական ազդեցություն ունի պարենային անվտանգության վրա։
«Պետք է հետևողականորեն քննարկենք և առերեսվենք արտաքին առևտրի ասիմետրիկ իրավիճակի հետ, որն անմիջական ազդեցություն ունի պարենային անվտանգության վրա։ Մենք պետք է միշտ հաշվի առնենք այս ռիսկերը և մշակենք համապատասխան լուծումներ»,- եզրափակեց Գրիգորյանը։