Հայաստանը և Հունաստանը մտադիր են նոր թափ հաղորդել տնտեսական հարաբերություններին

ԵՐԵՎԱՆ, 17 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանն ու Հունաստանը մտադիր են նոր թափ հաղորդել տնտեսական հարաբերություններին, ցանկանում են մեծացնել առևտրաշրջանառության ծավալները, բիզնեսներին փոխադարձաբար ներդրումային հնարավորություններ են առաջարկում: 

«Արմենպրես»-ի հաղորդմամբ՝ Երևանում դեկտեմբերի 17-ին անցկացվեց Հայաստանի Հանրապետության և Հունաստանի Հանրապետության միջև տնտեսական, արդյունաբերական և գիտատեխնիկական համագործակցության միջկառավարական հանձնաժողովի 6-րդ նիստը: 

Հայաստանի էկոնոմիկայի նախարար, միջկառավարական հանձնաժողովի համանախագահ Գևորգ Պապոյանն ընդգծեց, որ Հայաստանի և Հունաստանի առևտրատնտեսական համագործակցությունը հիմնված է երկու պետությունների պատմական և մշակութային ամուր կապերի վրա։ «Հայաստանի Հանրապետության և Հունաստանի Հանրապետության միջև միջկառավարական հանձնաժողովի նիստերը դարձել են կարևոր հարթակ, որտեղ հնարավորություն է ընձեռվում քննարկել առկա հիմնախնդիրները և ուղենշել համագործակցության նոր ոլորտներ, մշակել գործուն մեխանիզմներ՝ ուղղված մեր երկրների ներուժի բացահայտմանը»,–ասաց Պապոյանը:

Նա արձանագրեց, որ հանձնաժողովի աշխատանքները Հայաստանի ու Հունաստանի միջև երկկողմ բազմաոլորտ համագործակցության զարգացման համատեղ ջանքերի հերթական ապացույցն են: Ըստ նախարարի՝ միջկառավարական հանձնաժողովն իր գործունեությամբ ևս կծառայի այս համագործակցության խորացմանը:

«Հայաստանից Հունաստան հիմնականում արտահանվում է ալյումինե փայլաթիթեղ և փոքր քանակությամբ այլ պատրաստի արտադրանքներ: Իսկ ներմուծվում են նավթամթերքի դասին պատկանող որոշ պատրաստի ապրանքներ: Ցավոք, դեռևս Հունաստանից Հայաստան ներմուծումն էականորեն գերազանցում է Հայաստանից դեպի Հունաստան արտահանմանը»,-լրագրողների հետ զրույցում ասաց Պապոյանը:

Այս տարի երկու երկրների առևտրաշրջանառության ծավալները տատանվել են 43-44 մլն դոլարի շրջանակում: Մասնավորապես այս տարվա հունվար–հոկտեմբերին Հայաստան-Հունաստան առևտրաշրջանառության ծավալը կազմել է 44 մլն 769.6 հազար դոլար, ինչը 14.3 տոկոսով նվազել է նախորդ տարվա նույն ժամանակահատվածի ցուցանիշի նկատմամբ: 

Նախարարը հիշեցրեց, որ ԵՄ-ի կողմից Ռուսաստանի նկատմամբ պատժամիջոցները, ցավոք, իրենց երկրորդային ազդեցությունն են ունենում նաև Հայաստանի տնտեսության վրա: Դեպի ԵՄ արտահանման համար GSP+ արտոնյալ համակարգից զրկվելը ևս իր բացասական ազդեցությունն է ունեցել: «Նպատակն է ունենալ կայուն աճ, այսինքն՝ Հայաստան-Հունաստան առևտրաշրջանառության շարունակական աճ՝ ինչպես արտահանման, այնպես էլ ներմուծման մասով»,-ասաց Պապոյանը: 

Երկու երկրներում փոխադարձաբար ներդրումներ կան, սակայն նախարարը և՛ հայկական կապիտալի ծավալը հունական տնտեսության մեջ, և՛ հունական կապիտալի ծավալը հայկական տնտեսության մեջ դեռևս շատ հեռու համարեց բավարար լինելուց: Ըստ նրա՝ տնտեսական հարաբերությունների ընթացքում տարբեր խոչընդոտներ են ի հայտ եկել, բայց դրան զուգահեռ քաղաքական հարաբերությունները մշտապես եղել են շատ բարձր մակարդակի վրա: «Ժամանակն է, որ թափ հաղորդենք մեր հարաբերություններին՝ տնտեսական առումով: Մենք կցանկանայինք, որ հունական կապիտալի ներկայացվածությունն ավելի ընդլայնվեր Հայաստանում, ինչը երկուստեք շահավետ կլինի մեր երկու երկրների տնտեսությունների համար»,-ասաց նախարարը:

Պապոյանը նշեց, որ Հայաստան-Եվրամիություն գործընկերությունը Հայաստանի Հանրապետության արտաքին քաղաքականության կարևորագույն առաջնահերթություններից է: Հունաստանի հետ տնտեսական կապերի զարգացումը բխում է արտահանման դիվերսիֆիկացիայի քաղաքականությունից:  

Նախարարն անդրադարձավ նաև Հայաստանի կառավարության «Խաղաղության խաչմերուկ» նախագծին,  որն ունի իրական հեռանկարներ՝ փակ սահմաններով, մասնատված տարածաշրջանը վերածելու տնտեսական համագործակցության հզոր հանգույցի՝ հյուսիս-հարավ և արևելք-արևմուտք գլոբալ փոխգործակցության համատեքստում։ 

«Հայաստանը և Հունաստանը ստեղծել են հզոր հարաբերություններ՝ ընդհանուր արժեքների և պատմական ընդհանրությունների վրա: Մեր փոխհամագործակցությունն ապացուցել է իր արդյունավետությունը երկկողմ հարաբերություններում, ինչպես նաև բազմակողմ տարբեր հարթակներում: Ունենք ընդհանուր ցանկություն՝ խորացնելու և ուժեղացնելու մեր հարաբերությունները»,-ասաց Հունաստանի տնտեսական դիվանագիտության գծով արտաքին գործերի փոխնախարար, միջկառավարական հանձնաժողովի համանախագահ  Կոնստանտինոս Ֆրագկոյանիսը:  

Նրա գնահատմամբ՝ Հայաստանի և Հունաստանի միջև այսօր ձևավորված են շատ կարևոր փոխհարաբերություններ, որոնք վերջին տարիների ընթացքում էլ ավելի են խորացել: Նա ներկայացրեց հունական կողմի շահագրգռվածությունը՝ նպաստելու առևտրաշրջանառության մեծացմանը, ինչպես նաև ներդրումներին, երկու երկրների կապերի ամրապնդմանը: 

 «Մենք Եվրոպայում ամենաարագ աճող տնտեսություններից մեկն ենք: Հունաստանը շատ բարենպաստ է օտարերկրյա ներդրումների համար: Եվ մենք կցանկանայինք, որ մեր բիզնես համայնքն ավելի շատ ներգրավվեր Հայաստանի հետ առևտրում և այնտեղ ներդրումներում»,-ասաց փոխնախարարը:

Նա նշեց, որ եթե Հայաստանն ընտրի եվրոպամետ քաղաքականությունը, ապա Հունաստանն ամբողջությամբ աջակցելու է դրան: Փոխնախարարը վստահեցրեց, որ Հունաստանը միշտ կանգնած է Հայաստանի կողքին՝ հույս հայտնելով, որ այս հանդիպումը հարաբերությունների միջև նոր կետ կլինի: 

Կողմերը քննարկել են համագործակցությունը տնտեսության տարբեր ճյուղերում, այդ թվում՝ բարձր տեխնոլոգիաների, արդյունաբերության, զբոսաշրջության և այլ ոլորտներում: 

Հյուրերին ողջունեց նաև Արտաքին գործերի փոխնախարար Պարույր Հովհաննիսյանը՝ խոսելով երկու երկրների հարաբերությունների, կապերի մասին: 

Հայաստանում Հունաստանի դեսպան Խրիստոս Սոֆիանոպուլոսը նշեց, որ երկու երկրների միջև զբոսաշրջությունը ևս աճի տեմպեր է գրանցում, Երևան-Աթենք ուղիղ չվերթներ կան: «Երկու երկրների միջև տնտեսական համագործակցությունը, նաև բիզնես համայնքները դեռ պետք է բացահայտեն իրենց ամբողջական ներուժը»,- ասաց դեսպանը՝ հավելելով, որ Հունաստանն աջակցում է Հայաստանում տնտեսական բարեփոխումներին: