Կալիֆոռնիայում մոլեգնող հրդեհները Մալիբուի բնակիչներին ստիպել են տարհանվել

ԵՐԵՎԱՆ, 11 ԴԵԿՏԵՄԲԵՐԻ, ԱՐՄԵՆՊՐԵՍ։ ԱՄՆ Կալիֆոռնիայի նահանգում մոլեգնող անտառային հրդեհների պատճառով Մալիբուի բնակիչները ստիպած են եղել տարհանվել, քանի որ հրդեհը սպառնում է նրանց տներին։ Բացի այդ, կրակի տարածման պատճառով տեղի են ունեցել հոսանքազրկումներ, փակվել են ճանապարհները։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։

Հրդեհը, որը ստացել է «Ֆրենկլինի հրդեհ» անվանումը, դեկտեմբերի 10-ին երկու հեկտարից տարածվել է գրեթե 1100 հեկտար տարածության վրա։ Կրակի արագ տարածմանը նպաստում են ուժգին քամիները։ 

Հրդեհը ոչնչացրել է մի քանի տուն. զոհեր և վիրավորներ չկան։ 

Լոս Անջելեսի հրշեջ ծառայության ղեկավարը հայտարարել է, որ հրդեհաշիջման աշխատանքներում ներգրավված 700 հրշեջներին կմիանան ևս 300-ը։

Հրդեհն առայժմ չի հաջողվել մեկուսացնել։