2 րոպեի ընթերցում
ԵՐԵՎԱՆ, 3 ԴԵԿՏԵՄԲԵՐԻ, ԱՐՄԵՆՊՐԵՍ: Հայ գինեկոլոգ, ուռուցքաբան, վիրաբույժ Արտեմ Ստեփանյանը Հնդկաստանի Կոչին քաղաքում կմասնակցի Համահնդկական օնկոգինեկոլոգների ասոցիացիայի տարեկան գիտական մեծ կոնգրեսին:
«Արմենպրես»-ի հետ զրույցում «Նաիրի» բժշկական կենտրոնի օնկոգինեկոլոգիական ծառայության ղեկավարն ընդգծեց՝ գիտական մեծ կոնգրեսին մասնակցում է կազմակերպիչների հատուկ հրավերով: Ըստ մասնագետի՝ համաժողովին սովորաբար մասնակցում են Հնդկաստանի բժիշկները և արտասահմանից մի քանի հրավիրյալ բժիշկներ:
«Այս տարի հրավիրված են չորս արտասահմանցի բժիշկներ, երկուսն՝ ԱՄՆ-ից, մեկը՝ Մեծ Բրիտանիայից, և մեկ մասնագետ՝ Հայաստանից:
Կոնգրեսին ներկայացնելու եմ երեք դասախոսություն, որոնք նվիրված են կանացի չարորակ ուռուցքների վիրահատություններին: Չեմ վախենա ասել, որ մեր բաժանմունքի վիրաբույժները լավագույնն են, և դա ապացուցում է նաև այն փաստը, որ շատ հաճախ ենք տարբեր երկրներից նման հրավերներ ստանում, որպեսզի ներկայացնենք և սովորեցնենք մեր վիրահատական տեխնիկան:
Իմ զեկույցում ներկայացնելու եմ մեր բաժնի վիրահատական տեխնիկան, ինչպես նաև վիրահատությունների արդյունքներն ու ձեռքբերումները: Այսինքն, ես այնտեղի մասնագետներին սովորեցնելու եմ, թե մենք ինչպես ենք վիրահատություն իրականացնում»,- ասաց նա:
Մասնագետն ընդգծեց՝ Հայաստանի համար նման այցերը կարևոր են, և այս հրավերը վկայում է, որ Հայաստանում կան հիվանդանոցներ և մասնագետներ, որոնք միջազգային հարթակներում մեծ անուն ունեն և պահանջված են:
«Այս համաժողովն օնկոգինեկոլոգիայի ոլորտի ամենախոշոր տարեկան կոնֆերանսն է Հնդկաստանում, որտեղ հրավիրվում են աշխարհի լավագույն մասնագետները: Կարծում եմ՝ Հայաստանի համար մեծ պատիվ է, որ մեր երկրի դրոշը ծածանվի ԱՄՆ-ի և Մեծ Բրիտանիայի դրոշների կողքին նման կարևոր միջոցառման շրջանակում, քանի որ օնկովիրաբուժությունը ամենաբարդ ոլորտներից է»,-նշեց «Նաիրի» բժշկական կենտրոնի օնկոգինեկոլոգիական ծառայության ղեկավարը:
Գիտական կոնգրեսը Հնդկաստանում տեղի կունենա դեկտեմբերի 6-ից 8-ը: