1 րոպեի ընթերցում
ԵՐԵՎԱՆ, 2 ԴԵԿՏԵՄԲԵՐ, ԱՐՄԵՆՊՐԵՍ: Հայաստանի պարադահուկավազքի հավաքականի անդամ Գարիկ Մելքոնյանն առաջին մեդալն է նվաճել միջազգային մրցաշարում:
«Արմենպրես»-ի հաղորդմամբ` այս մասին հայտնում է Հայաստանի դահուկասպորտի ֆեդերացիան:
«Պարադահուկավազորդ Գարիկ Մելքոնյանը (Աշոցք) պատմության մեջ առաջին անգամ մեդալ է նվաճել միջազգային մրցաշարում: Առաջին անգամ մասնակցելով միջազգային մրցաշարի` նա գրավել է երրորդ հորիզոնականը Նորվեգիայում անցկացվող միջազգային վարկանիշային մրցաշարում։
Հաջորդիվ Մելքոնյանը կմասնակցի հունվարին Թուրինում կայանալիք XXXII Համաշխարհային ուսանողական ձմեռային մարզական խաղերին, որտեղ հաշմանդամային սպորտն առաջին անգամ է ընդգրկվել: Պարադահուկավազորդը փետրվար-մարտ ամիսներին կմասնակցի նաև Նորվեգիայում կայանալիք պարադահուկավազքի աշխարհի գավաթին և աշխարհի առաջնությանը»,- ասված է հաղորդագրության մեջ։