Վրաստանը չի պլանավորում չեղարկել Արևմուտքի հետ հարաբերություններում խնդիրներ առաջացրած օրենքները

ԵՐԵՎԱՆ, 19 ՆՈՅԵՄԲԵՐԻ, ԱՐՄԵՆՊՐԵՍ: Վրաստանի իշխանությունները չեն պլանավորում չեղարկել օտարերկրյա գործակալների մասին, ինչպես նաև ԼԳԲՏ քարոզչությունն արգելելու մասին օրենքները։ Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին ճեպազրույցում հայտարարել է իշխող «Վրացական երազանք-Ժողովրդավարական Վրաստան» կուսակցության գործադիր քարտուղար Մամուկա Մդինարաձեն։

Լրագրողի այն հարցին, թե իշխանությունը որոշակի հանգամանքներում կչեղարկի արդյոք նշված օրենքները, Մդինարաձեն պատասխանել է. «Ոչ: Դա հատկապես վերաբերում է ԼԳԲՏ քարոզչությանը, քանի որ սա այնպիսի հարց է, որի շուրջ մեզ հետ եվրաինտեգրման հարցով սակարկել չի կարելի»:

Վրաստանի խորհրդարանը 2024 թվականի մայիսին օրենք է ընդունել «Оտարերկրյա ազդեցության թափանցիկության մասին», որը տարաձայնություններ է առաջացրել ԵՄ-ի և ԱՄՆ-ի հետ հարաբերություններում, քանի որ Արևմուտքում սա համարում են ռուսական օրենք։ Այս օրենքի պատճառով ԱՄՆ-ն և ԵՄ-ն պատժամիջոցներ են սահմանել հանրապետության դեմ։

Արդեն սեպտեմբերին Վրաստանի խորհրդարանն ընդունել է ԼԳԲՏ քարոզչությունն արգելող օրենք։ Այս օրենքը նույնպես քննադատության առարկա է դարձել է Արևմուտքի կողմից։ Օրենքի հիմնական նպատակն այն հարցերի պարզաբանումն է, որոնք կապված են ամուսնության, անչափահասների որդեգրման և խնամակալության, սեռափոխության համար բժշկական միջամտությունների օգտագործման հետ։ Բացի այդ, մայիսի 17-ը պաշտոնապես հայտարարվել է Ընտանեկան սրբության և ծնողների հարգանքի օր։