Մեսրոպ Մեսրոպյանն ընտրվեց Հանրային ծառայությունները կարգավորող հանձնաժողովի նախագահ

ԵՐԵՎԱՆ, 15 ՆՈՅԵՄԲԵՐԻ, ԱՐՄԵՆՊՐԵՍ: Ազգային ժողովը Հանրային ծառայությունները կարգավորող հանձնաժողովի նախագահ ընտրեց Մեսրոպ Մեսրոպյանին: 

«Արմենպրես»-ի փոխանցմամբ՝ փակ գաղտնի քվեարկության արդյունքները ներկայացրեց ԱԺ հաշվիչ հանձնախմբի նախագահ Նարեկ Բաբայանը: 

ԱԺ 107 պատգամավորներից քվեարկությանը մասնակցել էր 66 պատգամավոր: Կողմ էր քվեարկել 65–ը, դեմ՝ 1 պատգամավոր: 

Մեսրոպ Մեսրոպյանի թեկնածությունն առաջադրել էր ՀՀ կառավարությունը:

Հանձնաժողովի նախագահի պաշտոնը թափուր էր մնացել, քանի որ Գարեգին Բաղրամյանը պաշտոնից հրաժարական էր ներկայացրել: Գարեգին Բաղրամյանը հանձնաժողովի նախագահի պաշտոնից ազատման դիմում էր ներկայացրել հոկտեմբերի 10-ին, հոկտեմբերի 18-ից նրա լիազորությունները դադարել էին: