1 րոպեի ընթերցում
ԵՐԵՎԱՆ, 13 ՆՈՅԵՄԲԵՐԻ, ԱՐՄԵՆՊՐԵՍ: ՆԳՆ ոստիկանության պետ-ՆԳ նախարարի տեղակալ Արամ Հովհաննիսյանը նոյեմբերի 13-ին ընդունել է Հայաստանում Չինաստանի ժողովրդական Հանրապետության գործերի ժամանակավոր հավատարմատար Չեն Մինին և Հասարակական անվտանգության նախարարության պաշտոնական ներկայացուցիչ Վան Ծինտաոյին։
Ինչպես «Արմենպրես»-ին տեղեկացրին ՀՀ ներքին գործերի նախարարությունից, Արամ Հովհաննիսյանը բարձր է գնահատել երկու պետության միջև ձևավորված բարեկամական հարաբերությունները՝ ընդգծելով հատկապես իրավապահ ոլորտում արդյունավետ համագործակցությունը։
Ոստիկանության պետը նշել է երկու երկրի իրավապահ մարմինների համատեղ ձեռքբերումները, կարևորել փոխգործակցության արդյունավետության բարձրացման ուղղությամբ ներդրված ջանքերը։
Ըստ աղբյուրի՝ շնորհակալություն հայտնելով ջերմ ընդունելության համար՝ Չեն Մինը նույնպես կարևորել է հայ-չինական 32-ամյա բարեկամական հարաբերությունները, ընդգծել հասարակական կարգի պահպանության և հասարակական անվտանգության ապահովման խնդիրների լուծման ուղղությամբ համատեղ աշխատանքները։
Նշվում է, որ քննարկվել են համագործակցության ընդլայնման, ինչպես նաև երկուստեք հետաքրքրություն ներկայացնող այլ հարցեր։