Ամենայն Հայոց կաթողիկոսի տնօրինությամբ կկատարվի համահայկական աղոթք Բաքվում շինծու մեղադրանքներով պահվող գերիների համար
1 րոպեի ընթերցում
ԵՐԵՎԱՆ, 7 ՆՈՅԵՄԲԵՐԻ, ԱՐՄԵՆՊՐԵՍ։ Ն.Ս.Օ.Տ.Տ. Գարեգին Երկրորդ Ամենայն Հայոց կաթողիկոսի տնօրինությամբ նոյեմբերի 10-ին Մայր աթոռ Սուրբ Էջմիածնում, Հայաստանի և սփյուռքի թեմերի բոլոր եկեղեցիներում, հընթացս Սուրբ Պատարագի, կկատարվի համահայկական աղոթք արցախահայերի իրավունքների պաշտպանության, մասնավորապես` Ադրբեջանի կողմից առևանգված, գերեվարված և Բաքվում շինծու մեղադրանքներով ապօրինաբար պահվող զինծառայողների, քաղաքացիական անձանց և ԼՂ ռազմաքաղաքական ղեկավարության ներկայացուցիչների համար։
«Արմենպրես»-ի փոխանցմամբ՝ այս մասին նշված է Մայր աթոռի տարածած հաղորդագրության մեջ:
Ամենայ Հայոց Հայրապետի կոչին ընդառաջ՝ Եկեղեցիների համաշխարհային խորհուրդը (ԵՀԽ) և Եվրոպայի Եկեղեցիների Կոնֆերանսը (ԵԵԿ) հորդորել են իրենց անդամ եկեղեցիներին ու բոլոր բարի կամքի տեր մարդկանց նոյեմբերի 10-ին միանալու Հայաստանին և արցախահայությանը նվիրված աղոթքի օրվան։