2 րոպեի ընթերցում
ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ: Վրաստանի շրջանային դատարանը 30 տեղամասերում չեղարկել է խորհրդարանական ընտրությունների արդյունքները քվեարկության գաղտնիության խախտումների պատճառով: «Արմենպրես»-ի փոխանցմամբ՝ այս մասին հաղորդել է «Ազատություն ռադիոկայան»-ի վրացական ծառայությունը։
Դատարանի որոշմամբ՝ վերարտադրվել է քվեարկության իրավիճակը Վրաստանի հարավում գտնվող Տետրիցկարոյի և Ծալկայի շրջանների երեք պատահական տեղամասերում։ Փորձարկման արդյունքում պարզվել է, որ քվեաթերթիկի հակառակ երեսից երևում է կուսակցության օգտին մարկերով արված նշումը։ Սա նշանակում է, որ երբ քվեաթերթիկը դրվում էր հաշվարկման սարքի մեջ, մոտակայքում կանգնած մարդիկ կարող էին հասկանալ, թե ում օգտին է քվեարկել ընտրողը:
Վրաստանի Կենտրոնական ընտրական հանձնաժողովն իրավունք ունի բողոքարկել շրջանային դատարանի որոշումը, սակայն փորձագետներն ասում են, որ արդեն ստեղծվել է նախադեպ։
Քվեարկության գաղտնիությունը խախտելու վերաբերյալ հայցեր է ներկայացրել Վրաստանի երիտասարդ իրավաբանների ասոցիացիան։ Կազմակերպությունը պահանջել է չեղարկել ընտրությունների արդյունքներն ավելի քան 2000 ընտրատեղամասերում։ Թբիլիսիի և այլ քաղաքների դատարանները չեն բավարարել բողոքները։
Խորհրդարանական ընտրություններում պաշտոնապես հաղթել է «Վրացական երազանք» իշխող կուսակցությունը՝ ստանալով ձայների 53,9 տոկոսը։ Եվս չորս ընդդիմադիր կուսակցություններ հաղթահարել են 5 տոկոսի շեմը։ Նրանք բոլորը հրաժարվել են ճանաչել ընտրությունների արդյունքներն ու մտնել խորհրդարան։ Ընդդիմությունը բողոքի ակցիաներ է անցկացնում։