1 րոպեի ընթերցում
ԵՐԵՎԱՆ, 28 ՀՈԿՏԵՄԲԵՐԻ, ԱՐՄԵՆՊՐԵՍ։ Ֆինլանդիայի դատարանն առաջին անգամ որոշում է կայացրել բռնագրավել ռուսական սառեցված պետական ակտիվները՝ ուկրաինական էներգետիկ ընկերության հայցից հետո:
«Արմենպրես»-ի հաղորդմամբ՝ այս մասին հայտնում է RBK-ն` հղում անելով Helsingin Sanomatին։
Նշվում է, որ խոսքը ուկրաինական «Naftogaz» ընկերության հայցի մասին է։
Ըստ այդմ՝ առգրավվել է Հելսինկիի գիտության և մշակույթի ռուսական կենտրոնին պատկանող 3,3 հեկտար տարածքը։
Ավելի վաղ՝ Ֆինլանդիայի իշխանությունները կալանքի տակ էին դրել կենտրոնի շենքը և տարածքը
«Naftogaz»-ը Ղրիմում կորուստների և կորցրած գույքի համար Ռուսաստանից 5 միլիարդ դոլար վերադարձնելու հայցը ներկայացրել էր անցյալ ամառ՝ Հաագայի արբիտրաժային դատարանի համապատասխան որոշումից հետո: Այնուհետև դատարանը Ռուսաստանին պարտավորեցրել է փոխհատուցում վճարել ուկրաինական ընկերությանը, որի գումարը պետք է հավասար լինի Ղրիմում նրա ակտիվների իրական շուկայական արժեքին մինչև դրանց օտարումը:
Ընկերությունը նախազգուշացրել է, որ եթե Մոսկվան հրաժարվի, Կիևը կարող է դատական վճիռը կիրառել այն երկրների տարածքում, որտեղ կան ռուսական ակտիվներ։