2 րոպեի ընթերցում
ԵՐԵՎԱՆ, 28 ՀՈԿՏԵՄԲԵՐԻ, ԱՐՄԵՆՊՐԵՍ: Իրանին իսրայելական հարվածից հետո երկիրը կշարունակի հավատարիմ մնալ միջուկային զենքի ստեղծումից հրաժարվելու քաղաքականությանը։ «Արմենպրես»-ի փոխանցմամբ՝ այդ մասին հայտարարել է Իրանի արտաքին գործերի նախարարության պաշտոնական ներկայացուցիչ Էսմայիլ Բաղային։
«Զանգվածային ոչնչացման զենքի վերաբերյալ մեր դիրքորոշումն առավելագույն չափով պարզ է և մնում է անփոփոխ. հիմնվելով մեր երկրի բարձրագույն կրոնաքաղաքական իշխանության ֆեթվայի (խմբ.՝ հոգևոր բարձրագույն անձի վճիռ) և ողջախոհության վրա՝ մենք չենք պատրաստվում մեր միջուկային ծրագիրը տեղափոխել ռազմական հուն», - նրա խոսքերն է մեջբերում ՏԱՍՍ-ը։
2003 թվականից Իրանում գործում է գերագույն առաջնորդի ֆեթվան այն մասին, որ միջուկային զենքի արտադրությունն արգելված է, քանի որ հակասում է իսլամին։
Հոկտեմբերի 26-ի գիշերը Իսրայելը մի շարք ավիահարվածներ է հասցրել Իրանի ռազմական օբյեկտներին՝ ի պատասխան հոկտեմբերի 1-ին Իսրայելի վրա Թեհրանի հրթիռային հարձակումների: Հարձակումից ժամեր անց Իսրայելը հայտարարել էր, որ ավարտել է հարվածները և հասել իր նպատակներին։ Իրանում հայտնել էին, որ հարվածների են ենթարկվել Իլամի, Խուզեստանի և Թեհրանի նահանգները, սակայն հարվածները հաջողությամբ հետ են մղվել: Հարձակման հետևանքով 4 իրանցի զինվորական է զոհվել։