Գազայում զոհերի թիվը մոտեցել է 43 հազարի

ԵՐԵՎԱՆ, 27 ՀՈԿՏԵՄԲԵՐԻ, ԱՐՄԵՆՊՐԵՍ: Վերջին 48 ժամում իսրայելական զինված ուժերի գործողությունների հետևանքով Գազայի հատվածում 77 պաղեստինցի է զոհվել, 289-ը՝ վիրավորվել։

«Արմենպրես»-ի հաղորդմամբ` այս մասին «Տելեգրամ»-ի ալիքում տեղեկացրել է Գազայի առողջապահական գերատեսչությունը՝ նշելով, որ զոհերի և վիրավորների վիճակագրությունը չի ներառում Գազայի հատվածի հյուսիսում գտնվող հիվանդանոցները՝ կապված դրանց շրջափակման, կապի ու մուտք գործելու դժվարությունների հետ:

Աղբյուրի փոխանցմամբ՝ նախորդ տարվա հոկտեմբերի 7-ից Իսրայելի հարվածների հետևանքով Գազայում զոհերի թիվը հասել է 42 հազար 924-ի, իսկ վիրավորներինը՝ 100 հազար 833-ի: