2 րոպեի ընթերցում
ԵՐԵՎԱՆ, 21 ՀՈԿՏԵՄԲԵՐԻ, ԱՐՄԵՆՊՐԵՍ: Երկրպագուների «Հայկական առաջին ճակատ» (ՖԱՖ) շարժումը և հայկական բոլոր ֆան-ակումբները շարունակում են պահանջել Հայաստանի ֆուտբոլի ֆեդերացիայի նախագահ Արմեն Մելիքբեկյանի հրաժարականը:
«Այժմ կտրուկ գործողությունների փուլն է, որը լինելու է ֆուտբոլային, ֆանատական շրջանակներում: Մեր խնդիրը ձախողված ֆեդերացիան է, որը ձախողվել է բոլոր բաղադրիչներով»,- «Արմենպրես»-ի հաղորդմամբ` ասել է ՖԱՖ շարժման հիմնադիր Սերգեյ Ջանջոյանը` հրապարակելով ՖԱՖ-ի և հայկական ֆան-ակումբների հայտարարությունը:
Ավելի վաղ ՀՖՖ նախագահ Արմեն Մելիքբեկյանը հայտարարել էր, որ չի պատրաստվում լքել ՀՖՖ նախագահի պաշտոնը և շարունակելու է աշխատանքը` նպատակ ունենալով ավարտին հասցնել նախանշված ծրագրերը:
Հայաստանի ֆուտբոլի ազգային թիմը հոկտեմբերի 13-ին Երևանում հյուրընկալելով Հյուսիսային Մակեդոնիայի հավաքականին, զիջեց 0:2 հաշվով: Դրան հաջորդեց ազգային ընտրանու գլխավոր մարզիչ Ալեքսանդր Պետրակովի հեռացումը զբաղեցրած պաշտոնից: Հյուսիսային Մակեդոնիայից կրած պարտությունից հետո ՖԱՖ-ը բողոքի ակցիա էր անցկացրել Հայաստանի ֆուտբոլի ֆեդերացիայի շենքի մոտ՝ պահանջելով Արմեն Մելիքբեկյանի հրաժարականը։