1 րոպեի ընթերցում
ԵՐԵՎԱՆ, 14 ՀՈԿՏԵՄԲԵՐԻ, ԱՐՄԵՆՊՐԵՍ: Երկրպագուների «Հայկական առաջին ճակատ» (ՖԱՖ) շարժումը պահանջում է Հայաստանի ֆուտբոլի ֆեդերացիայի նախագահ Արմեն Մելիքբեկյանի հրաժարականը:
«Արմենպրես»-ի հաղորդմամբ` Հայաստան-Հյուսիսային Մակեդոնիա խաղից հետո շարժումը մոտեցել է ՀՖՖ գրասենյակ` նպատակ ունենալով հանդիպել Ֆուտբոլի ֆեդերացիայի նախագահ Արմեն Մելիքբեկյանին, սակայն պաշտոնյան չի մոտեցել երկրպագուներին:
«Մենք աջակցել ենք Արմեն Մելիքբեկյանին, ցանկացել ենք, որ դրական փոփոխություններ լինեն մեր ֆուտբոլում: Բայց, ցավոք, այդ փոփոխությունները մենք չենք տեսել: Մեր դիրքորոշումը եղել է այն, որ ֆեդերացիային պետք է ժամանակ տալ: Սակայն հասել ենք այն իրավիճակին, որ ՀՖՖ նախագահը չի գալիս մեզ հետ հանդիպման, և սա առաջին դեպքը չի: Այս պարագայում մենք այն կարծիքին ենք, որ ՀՖՖ նախագահը պետք է հեռանա»,-ասել է ՖԱՖ շարժման հիմնադիր Սերգեյ Ջանջոյանը:
Նախօրեին Հայաստանի ֆուտբոլի ազգային թիմը, Երևանում հյուրընկալելով Հյուսիսային Մակեդոնիայի հավաքականին, զիջեց 0:2 հաշվով: Դրան հաջորդեց ազգային ընտրանու գլխավոր մարզիչ Ալեքսանդր Պետրակովի հեռացումը զբաղեցրած պաշտոնից: