Ինչո՞ւ Ադրբեջանը կարող է Իտալիայից, Չեխիայից, Սլովակիայից զենք գնել, իսկ Հայաստանը չի կարող Ֆրանսիայից զենք ձեռք բերել. վարչապետ
2 րոպեի ընթերցում
ԵՐԵՎԱՆ, 18 ՍԵՊՏԵՄԲԵՐԻ, ԱՐՄԵՆՊՐԵՍ։ Հայաստանն անվտանգության ոլորտի իր հարաբերությունները որոշակիորեն դիվերսիֆիկացնում է։ «Արմենպրես»-ի հաղորդմամբ՝ այս մասին ասաց վարչապետ Նիկոլ Փաշինյանը Համաշխարհային հայկական երկրորդ գագաթնաժողովում՝ անդրադառնալով անվտանգային միջավայրի տեսլականին։
«Վերջերս շատ կարևոր որոշում կայացվեց՝ Եվրամիությունը՝ Խաղաղության եվրոպական հիմնադրամը, Հայաստանին աջակցություն տրամադրեց, որը զուտ դրամական և տեխնիկական առումով սիմվոլիկ է, բայց շատ մեծ նշանակություն ունի։ Մենք տարբեր երկրների հետ ռազմատեխնիկական համագործակցություն ենք իրականացնում։ Նաև պրոֆեսիոնալ բանակ ենք ստեղծում»,-ընդգծեց Փաշինյանը։
Վարչապետը նաև անդրադարձավ Ադրբեջանի իշխանության կողմից արված հայտարարություններին, մասնավորապես, որ Հայաստանը Ֆրանսիայից սպառազինություն է գնում։
«Հետաքրքիրը գիտեք ի՞նչն է։ Նրանք ասում են՝ Արևմուտքը զինում է Հայաստանին։ Կներեք, բայց որ Ադրբեջանը Չեխիայից, Սլովակիայից, Իտալիայից զենք է գնում, երբվանի՞ց այդ երկրներն այլևս Արևմուտք չեն։
Ինչո՞ւ Ադրբեջանը կարող է Իտալիայից, Չեխիայից, Սլովակիայից զենք գնել, իսկ Հայաստանը չի կարող Ֆրանսիայից զենք ձեռք բերել։ Ինչո՞ւ Ադրբեջանը կարող է Պակիստանից զենք ձեռք բերել, իսկ Հայաստանը Հնդկաստանից չի կարող»,-նշեց Փաշինյանը։
Վարչապետը նաև հիշեցրեց, որ Հայաստանի զինված ուժերի բարեփոխումները ոչ մի ագրեսիվ ենթատեքստ չունեն։
«Մենք ասում ենք՝ 29743 քկմ ինքնիշխան տարածքի պաշտպանությունն է մեր խնդիրը, իրավունք, որը երաշխավորված է ՄԱԿ-ի կանոնադրությամբ։ Ընդ որում, նաև ՄԱԿ-ի և այլ միջազգային կազմակերպությունների փաստաթղթերը պետության վրա դնում են պարտավորություն ապահովելու իրենց քաղաքացիների անվտանգությունը։ Եվ մենք այս պարտավորությունները կատարելու ենք»,-եզրափակեց Փաշինյանը։