2 րոպեի ընթերցում
ԵՐԵՎԱՆ, 16 ՍԵՊՏԵՄԲԵՐԻ, ԱՐՄԵՆՊՐԵՍ։ Կենտրոնական Եվրոպայում մի քանի օր շարունակվող հորդառատ անձրևներից առաջացած հեղեղումների զոհերի թիվը հասել է 8-ի։ Հազարավոր մարդիկ տարհանվել են իրենց տներից Չեխիայում, որտեղ հորդառատ անձրևներից հետո մի շարք շրջաններում գետերը դուրս են եկել ափերից։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
Հորդառատ անձրևներ են տեղացել նաև Ավստրիայում, Հունգարիայում, Ռումինիայում, Լեհաստանում։ Հեղեղումների պատճառով մեկ մարդ զոհվել է Լեհաստանում, մեկը՝ Ավստրիայում, ևս վեցը՝ Ռումինիայում։
Ըստ կանխատեսումների՝ սեպտեմբերի 16-ին անձրևները և ուժգին քամիները կշարունակվեն։
Հեղեղումների պատճառով սեպտեմբերի 14-ին և 15-ին հազարավոր տներ են վնասվել, կամուրջներ ավերվել, առնվազն 250 000 տուն, հիմնականում՝ Չեխիայում, մնացել է առանց էլեկտրականության։
Լեհաստանի պատմական Գլուխոլազի քաղաքում սեպտեմբերի 16-ին բնակչության տարհանում է հայտարարվել, փլուզվել է մեկ կամուրջ։ Եվս մեկ կամուրջ ոչնչացել է Ստրոնե Սլյոնսկե քաղաքում, որտեղ ամբարտակ է փլուզվել։ Լեհաստանի վարչապետ Դոնալդ Տուսկը հայտարարել է, որ կառավարությունը կհայտարարի աղետի դրություն և Եվրամիության օգնությանը կդիմի։
Չեխիայում դեռ որոնում են երեք անհետ կորածների, որոնք գտնվում էին սեպտեմբերի 14-ին գետն ընկած մեքենայում։
Հունգարիայի իշխանությունները նախազգուշացրել են, որ մայրաքաղաք Բուդապեշտում Դանուբ գետի մակարդակը շաբաթվա երկրորդ կեսին կարող է բարձրանալ և հասնել ավելի քան 8,5 մետրի։