ՀՀ դեսպանը Հունաստանի խորհրդարանի հանձնաժողովի նախագահին է ներկայացրել Հայաստան-Ադրբեջան խաղաղության պայմանագրի շուրջ ընթացող բանակցությունները
2 րոպեի ընթերցում
![ՀՀ դեսպանը Հունաստանի խորհրդարանի հանձնաժողովի նախագահին է ներկայացրել Հայաստան-Ադրբեջան խաղաղության պայմանագրի շուրջ ընթացող բանակցությունները](http://armenpress.am/resized/480/storage/images/articles/2024/09/05/M6hfo5sENIRKsHbYsU9AqridVKxEjf5NqGgRoMUu.webp)
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ: Հունաստանում ՀՀ արտակարգ և լիազոր դեսպան Տիգրան Մկրտչյանը հանդիպել է Հունաստանի խորհրդարանի Ազգային պաշտպանության և արտաքին հարաբերությունների մշտական հանձնաժողովի նախագահ Թեոդորա Բակոյանիին։
«Արմենպրես»-ի հաղորդմամբ՝ Հունաստանում Հայաստանի դեսպանության «Ֆեյսբուք»-ի էջը տեղեկացնում է, որ հանդիպմանը դեսպան Մկրտչյանն ընդգծել է հայ-հունական հարաբերությունների գերազանց մակարդակը և կարևորել խորհրդարանական դիվանագիտության դերը երկկողմ համագործակցությունը խթանելու համատեքստում։
«Դեսպանը, մասնավորապես, ներկայացրել է Հայաստան-Ադրբեջան խաղաղության պայմանագրի շուրջ ընթացող բանակցությունները, սահմանազատման գործընթացը և Ալմա-Աթայի հռչակագրի համապատասխան այն իրականացնելու անհրաժեշտությունը, Լեռնային Ղարաբաղում հայկական մշակութային ժառանգության դեմ իրականացվող քայլերը և Ադրբեջանում պահվող հայ ռազմագերիների և այլ պահվող անձանց օր առաջ ազատ արձակելու հրամայականը»,- ասվում է հաղորդագրության մեջ։
Ըստ աղբյուրի՝ Թեոդորա Բակոյանին շնորհակալություն է հայտնել ՀՀ դեսպանին այցելության համար և անդրադարձել միջխորհրդարանական շփումների կարևորությանը երկու բարեկամ երկրների միջև բազմակողմ համագործակցության խթանման գործում։
ՀՀ դեսպանը զրուցակցին է ներկայացրել նաև Հայաստանում և տարածաշրջանում վերջին զարգացումները։
Քննարկվել են երկկողմ խորհրդարանական կապերի ակտիվացմանն ուղղված մի շարք միջոցառումներ: