2 րոպեի ընթերցում
ԵՐԵՎԱՆ, 3 ՍԵՊՏԵՄԲԵՐԻ, ԱՐՄԵՆՊՐԵՍ: Դպրոցի տնօրենները և համակարգողները իրենց պաշտոնավարման ընթացքում պարտավոր են դրսևորել քաղաքական զսպվածություն:
«Արմենպրես»-ի փոխանցմամբ՝ «Հանրակրթության մասին» օրենքում փոփոխություններ եւ լրացումներ կատարելու մասին օրենքի նախագծով այս պահանջն ամրագրվում է օրենքում:
ԱԺ Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նիստում նախագծի ներկայացմանը Կրթության, գիտության, մշակույթի և սպորտի նախարար Ժաննա Անդրեասյանն ընդգծեց. «Սա համարում եմ կարևորագույն հանձնառություն, որ հետևողականորեն իրականացնում ենք՝կրթական համակարգը զերծ պահելու կուսակցականացման և քաղաքականացման այն ջանքերից, որոնք տեսնում ենք պարբերաբար, և որոնց վատ ավանդույթը, ցավոք, ունեցել ենք»:
Այսպիսով` նախագծով, ի թիվս այլ փոփոխությունների, սահմանվում է՝ տնօրենը և համակարգողն իրենց պաշտոնավարման ընթացքում պարտավոր են դրսևորել քաղաքական զսպվածություն, իրենց պաշտոնեական դիրքը կամ աշխատանքային միջոցները չօգտագործել կուսակցությունների կամ հասարակական, այդ թվում` կրոնական միավորումների շահերի համար կամ նրանց նկատմամբ վերաբերմունք քարոզելու կամ իրենց պաշտոնական պարտականությունները կատարելիս այլ քաղաքական կամ կրոնական գործունեություն իրականացնելու համար:
Նախարարը կարևորեց, որ այդպիսով վարքային պահանջ են սահմանում, քանի որ մարդը կարող է չլինել կուսակցական, միևնույն ժամանակ հաջողությամբ իր դիրքն օգտագործել այդ նպատակներով: Իսկ քաղաքական զսպվածության պահանջը վարքային պահանջ է սահմանում և համապատասխան սանկցիաների հնարավորություն է տալիս: Անդրեասյանը հավելեց՝ եթե որևէ մեկը կխախտի այդ դրույթը, համապատասխան հետևանքները կկիրառվեն: