ԵՐԵՎԱՆ, 3 ՍԵՊՏԵՄԲԵՐԻ, ԱՐՄԵՆՊՐԵՍ: Մեծ Բրիտանիան և ԱՄՆ-ն պատրաստվում են առանց ժամանակային սահմանափակումների երկարաձգել Փոխադարձ պաշտպանության պայմանագիրը, որը որոշում է միջուկային զենքի ոլորտում երկրների համագործակցությունը, և որի գործողության հաջորդ ժամկետը լրանում է 2024 թվականին: «Արմենպրես»-ի փոխանցմամբ՝ այս մասին հաղորդում է Financial Times-ը (FT):
«Մեծ Բրիտանիան և ԱՄՆ-ն պլանավորում են անժամկետ հիմունքներով պահպանել պայմանագիրը, որը կարգավորում է երկրների միջև միջուկային տեխնոլոգիաների փոխանակումը՝ միևնույն ժամանակ ձեռնամուխ լինելով իրենց զսպման ուժերի թանկարժեք արդիականացմանը՝ հակառակորդ երկրների զինանոցների մեծացմանն ի պատասխան», - տեղեկացնում է հրատարակությունը:
FT-ն պարզաբանում է, որ ավելի վաղ և՛ Մեծ Բրիտանիայի, և՛ ԱՄՆ-ի իշխանությունները խորհուրդ են տվել չեղարկել համաձայնագրի գործողության 10 տարի ժամկետը և այն դարձնել անժամկետ, սակայն երկու երկրների օրենսդիր մարմինները դեռ պետք է հաստատեն նման նորամուծությունը։
Բրիտանիայի լեյբորիստական նոր կառավարությունը փաստաթուղթը խորհրդարան է ներկայացրել հուլիսի 26-ին՝ երկրում ընտրություններից երեք շաբաթ անց։ Այդ ժամանակ Մեծ Բրիտանիայի պաշտպանության նախարար Ջոն Հիլին հայտարարել էր, որ երկու երկրները համաձայնել են հանել գործողության ժամկետը լրանալու ամսաթիվը, որպեսզի պայմանագիրը դառնա երկարաժամկետ և ապահովի համագործակցության շարունակականությունը։
Խորհրդարանի երկու պալատներն ամառային արձակուրդից վերադարձել են սեպտեմբերի 2-ին։ Փոխադարձ պաշտպանության պայմանագիրն ինքնաբերաբար կերկարացվի, եթե խորհրդարանի որևէ պալատ նիստերի 21 օրերի ընթացքում դրան դեմ բանաձև չընդունի:
Իր հերթին ԱՄՆ նախագահ Ջո Բայդենը Կոնգրեսին ուղղված հուլիսի 29-ի նամակում կոչ է արել կրկին վավերացնել պայմանագիրը։