Ռումինիայի կառավարությունը հավանություն է տվել Կիևին Patriot համակարգ տրամադրելու օրինագծին
1 րոպեի ընթերցում
![Ռումինիայի կառավարությունը հավանություն է տվել Կիևին Patriot համակարգ տրամադրելու օրինագծին](http://armenpress.am/resized/480/storage/images/articles/2024/09/02/HXP8aBH2xQ9NkDIabT9Kkg0IJaS6ZUF0tnyj5Lr6.webp)
ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Ռումինիայի կառավարությունը կողմ է քվեարկել օրինագծին, որը թույլ կտա Ուկրաինային Patriot զենիթահրթիռային համակարգ (ԶՀՀ) մատակարարել, եթե օրենքը հաստատվի խորհրդարանի կողմից: «Արմենպրես»-ի փոխանցմամբ՝ այս մասին հաղորդում է Reuters գործակալությունը։
«Այն բանից հետո, երբ խորհրդարանը հավանություն կտա օրենքին, կառավարությունը կկարողանա որոշում կայացնել, որը թույլ կտա ԶՀՀ-ն նվիրաբերել», - ասել է Ռումինիայի կառավարության խոսնակ Միխայ Կոնստանտինը։
Հունիսին Բուխարեստը խոստացել էր Ուկրաինային մատակարարել իր զինանոցում առկա երկու գործող Patriot ԶՀՀ-ներից մեկն այն պայմանով, որ դաշնակիցներն այնուհետև այն կփոխարինեն հակաօդային պաշտպանության նմանատիպ համակարգով։
ՆԱՏՕ-ի երկրներն ավելի վաղ խոստացել էին Ուկրաինային տրամադրել ընդհանուր առմամբ հինգ նման ԶՀՀ և այլ ՀՕՊ միջոցներ:
2017 թվականին Ռումինիան 4 մլրդ դոլարի գործարք է կնքել Patriot ԶՀՀ-ներ ձեռք բերելու համար, որոնք արտադրվում են ամերիկյան Raytheon Technologies ընկերության կողմից։ Բուխարեստն իր առաջին խմբաքանակն ստացել է 2020 թվականին։ Այսօրվա դրությամբ Ռումինիան ունի չորս նման համակարգ, որոնցից երկուսը գործող են։