Իսրայելի դատարանը կարգադրել է ավարտել համընդհանուր գործադուլը
2 րոպեի ընթերցում
![Իսրայելի դատարանը կարգադրել է ավարտել համընդհանուր գործադուլը](http://armenpress.am/resized/480/storage/images/articles/2024/09/02/uB9aLthrtcMQBYu4g3gl6a5fFnvNycAScyMTootl.webp)
ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ։ Իսրայելի դատարանը կարգադել է, որ սեպտեմբերի 2-ին երկրում հայտարարված համընդհանուր գործադուլը դադարեցվի տեղի ժամանակով ժամը 14:30-ին։ «Արմենպրես»-ի փոխանցմամբ՝ այս մասին հաղորդում է The Jerusalem Post պարբերականը։
Իսրայելի աշխատավորների համընդհանուր կազմակերպության ղեկավարը հայտարարել է, որ իրենք «հարգում են օրենքը» և կդադարեցնեն գործադուլը, ինչպես կարգադրել է դատարանը։ Մինչ այդ կազմակերպության ներկայացուցիչը հայտարարել էր, որ գործադուլը կավարտվի ժամը 18:00-ին։
Միևնույն ժամանակ, ըստ պարբերականի, արհմիությունը բանակցություններ է վարում ավիացիոն իշխանությունների հետ, որպեսզի նրանք ընդլայնեն գործադուլը և սահմանափակեն օդանավակայանի գործունեությունը։
Գործադուլի առիթ է դարձել այն, որ Իսրայելի պաշտպանության բանակն օգոստոսի 31-ին Գազայի հատվածում ևս վեց պատանդի մարմին էր գտել։ Սեպտեմբերի 1-ին Երուսաղեմում, Թել Ավիվում և Իսրայելի այլ քաղաքներում ցույցեր էին տեղի ունեցել, որոնց, ըստ Reuters-ի, մասնակցել է շուրջ 500 000 մարդ։ Ցուցարարները պահանջում էին, որ իշխանություններն ավելի շատ բան անեն պաղեստինյան ՀԱՄԱՍ արմատական շարժման մոտ պահվող պատանդներին վերադարձնելու համար։
Ըստ լրատվամիջոցների՝ 29 ցուցարար ձերբակալվել է։