Բայդենը հավանություն է տվել միջուկային զենքի օգտագործման գաղտնի ծրագրին. NYT
2 րոպեի ընթերցում
![Բայդենը հավանություն է տվել միջուկային զենքի օգտագործման գաղտնի ծրագրին. NYT](http://armenpress.am/resized/480/storage/images/articles/2024/08/21/oZdfEpQi9tBCZZPjuGMTy8CTjveqQ1kzVeHkYrfl.webp)
ԵՐԵՎԱՆ, 21 ՕԳՈՍՏՈՍԻ, ԱՐՄԵՆՊՐԵՍ: ԱՄՆ նախագահ Ջո Բայդենը դեռ այս տարվա մարտին հավանություն է տվել վերանայված ռազմավարությանը, որը ստացել է «Միջուկային զենքի կիրառման ուղեցույց» անվանումը, ինչի մասին Սպիտակ տունը չի հայտարարել: «Արմենպրես»-ի փոխանցմամբ՝ այս մասին հաղորդում է The New York Times-ը:
Լրատվամիջոցը պարզաբանում է, որ վերանայումը կապված է, այդ թվում, «Չինաստանի կողմից իր միջուկային զինանոցի արագ ընդլայնման» հետ։
«Պենտագոնը կարծում է, որ հաջորդ տասնամյակում Չինաստանի պաշարները (միջուկային զենքի) չափերով և բազմազանությամբ կմրցեն Միացյալ Նահանգների և Ռուսաստանի պաշարների հետ», - նշում է հրատարակությունը:
Պարբերականը գրում է, որ ևս մեկ գործոն է դարձել այն, որ ԱՄՆ-ն անհրաժեշտ է համարում «Չինաստանի, Ռուսաստանի և Հյուսիսային Կորեայի կողմից հնարավոր համակարգված միջուկային մարտահրավերներին պատրաստվելը»:
Հունիսին Սպիտակ տան Ազգային անվտանգության խորհրդի սպառազինությունների վերահսկման և չտարածման հարցերով ավագ տնօրեն Փրանայ Վադդին նույնպես վկայակոչել է այն փաստաթուղթը, որում առաջին անգամ մանրամասնորեն քննության է առնվում, թե արդյոք Միացյալ Նահանգները պատրաստ է արձագանքել միջուկային ճգնաժամերին, որոնք բռնկվում են միաժամանակ կամ հաջորդաբար՝ միջուկային և ոչ միջուկային զենքի կիրառմամբ։ Նրա խոսքով՝ նոր ռազմավարությունում ընդգծվում է «Ռուսաստանին, Չինաստանին և Հյուսիսային Կորեային միաժամանակ զսպելու անհրաժեշտությունը»։
Ըստ հրապարակման՝ անցյալում քիչ հավանական էր թվում այն, որ ԱՄՆ-ի հակառակորդները կկարողանան համակարգել միջուկային սպառնալիքները:
Սպիտակ տնից հայտնել են, որ ծրագրի հաստատումն ուղղված չէ որևէ երկրի կամ կոնկրետ սպառնալիքի դեմ։ Դրա տեքստը գաղտնի է, սակայն դրա գոյությունը՝ ոչ։