Սպիտակ-Վանաձոր ավտոճանապարհին բախված չորս ավտոմեքենաներից մեկի վարորդը զոհվել է
1 րոպեի ընթերցում
![Սպիտակ-Վանաձոր ավտոճանապարհին բախված չորս ավտոմեքենաներից մեկի վարորդը զոհվել է](http://armenpress.am/resized/480/storage/images/articles/2024/08/18/PMl5zbXv2xXmC5qMBqoDUKr1AAxLQ1A9AHZJtp8K.webp)
ԵՐԵՎԱՆ, 18 ՕԳՈՍՏՈՍԻ, ԱՐՄԵՆՊՐԵՍ: Լոռու մարզային ճգնաժամային կառավարման կենտրոնն օգոստոսի 18-ին, ժամը 13։31-ին ահազանգ է ստացել, որ Սպիտակ-Վանաձոր ավտոճանապարհի մոտ 4-րդ կմ-ին տեղի է ունեցել ՃՏՊ՝ բախվել է չորս ավտոմեքենա․ անհրաժեշտ է փրկարարների օգնությունը։
Ինչպես «Արմենպրես»-ին տեղեկացրին ՀՀ ներքին գործերի նախարարության փրկարար ծառայությունից, դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատի մեկ մարտական հաշվարկ։
Պարզվել է, որ բախվել են «Nissan» (վարորդ՝ Ս. Հ., ծնված 1958 թ․), երկու «Mitsubishi» և VAZ (վարորդ՝ Ռ. Չ., ծնված 1947 թ.) մակնիշների ավտոմեքենաները. VAZ մակնիշի ավտոմեքենայի վարորդը մահացել է։
Ըստ աղբյուրի՝ փրկարարները հոսանքազրկել են «Nissan» մակնիշի ավտոմեքենան, փակել երկու «Mitsubishi» և VAZ մակնիշների ավտոմեքենաների գազի բալոնների փականները, Ռ. Չ.-ի դին դուրս բերել ավտոմեքենայից և մոտեցրել դի տեղափոխող ավտոմեքենային։