«Հըզբոլլահ»-ը ցուցադրել է իր ստորգետնյա ռազմական օբյեկտներից մեկը
2 րոպեի ընթերցում
![«Հըզբոլլահ»-ը ցուցադրել է իր ստորգետնյա ռազմական օբյեկտներից մեկը](http://armenpress.am/resized/480/storage/images/articles/2024/08/16/REDgmG0jStg6IfzNT58zAEnaWZGWgBQ1T1eN0er9.webp)
ԵՐԵՎԱՆ, 16 ՕԳՈՍՏՈՍԻ, ԱՐՄԵՆՊՐԵՍ։ Լիբանանյան շիա «Հըզբոլլահ» շարժումը տեսանյութ է հրապարակել, որում ցուցադրվում է իր ստորգետնյա ռազմական օբյեկտներից մեկը՝ «Emad 4»-ը, որտեղից կարելի է հրթիռներ արձակել: Այդ մասին տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն։
«Օբյեկտը պարունակում է հեռահար հրթիռներ և ծանր հրթիռներ, որոնք հեշտությամբ շարժվում են թունելներով իրենց մեքենաների վրա: Թունելները լիովին հագեցած են տեխնոլոգիաներով և նյութատեխնիկական առումով»,- նշվում է տեսանյութում։
Ցուցադրվում են նաև լայն թունելների ցանցի կադրեր, որոնք միացնում են ստորգետնյա մեծ օբյեկտի տարբեր մասերը: Դրանք թույլ են տալիս տարբեր տրանսպորտային միջոցներին, այդ թվում՝ մոտոցիկլետներին և բեռնատարներին, ազատ տեղաշարժվել: Օբյեկտը համալրված է համակարգիչներով և լուսավորությամբ, իսկ հրթիռային կայանները գտնվում են քողարկված ստորգետնյա հատվածներում։
Ավելի վաղ «Հըզբոլլահ»-ը հայտարարել էր Իսրայելի հյուսիսում գտնվող սահմանային գոտում 7 դիրքերի և Իսրայելի պաշտպանության բանակի անձնակազմի կենտրոնացման մի քանի վայրերի խոցման մասին: Ի պատասխան՝ իսրայելական օդուժը ավիահարված է հասցրել Լիբանանի հարավում գտնվող Այթրուն գյուղի բնակելի շենքին, ինչի արդյունքում մեկ մարդ զոհվել է, մի քանիսը վիրավորվել են։