Իրանի Գերագույն առաջնորդը հրամանագրով Փեզեշքիանին հաստատել է երկրի նախագահի պաշտոնում
1 րոպեի ընթերցում
ԵՐԵՎԱՆ, 28 ՀՈՒԼԻՍԻ, ԱՐՄԵՆՊՐԵՍ: Իրանի հոգևոր առաջնորդ Ալի Խամենեին հրամանագիր է ստորագրել Մասուդ Փեզեշքիանին Իրանի Իսլամական Հանրապետության նախագահի պաշտոնում հաստատելու վերաբերյալ:
«Արմենպրես»- ի հաղորդմամբ՝ այդ առթիվ տեղի ունեցած արարողության հեռարձակումն իրականացրել է IRIB հեռուստաալիքը։
Թեհրանում կայացած միջոցառմանը ներկա են եղել Իրանի բազմաթիվ բարձրաստիճան պաշտոնյաներ ու հոգևորականներ։
Արարողությունը սկսվել է ներքին գործերի նախարարության ղեկավար Ահմադ Վահիդիի զեկույցով՝ տեղի ունեցած նախագահական ընտրությունների մանրամասների վերաբերյալ։ Հրամանագրի տեքստն ընթերցել է Խամենեիի գրասենյակի ղեկավարը։ Իրանի Գերագույն առաջնորդը հրամանագրի բնօրինակը հանձնել է անձամբ Փեզեշքիանին։ Նոր նախագահը երախտագիտության խոսք է հղել ժողովրդին և համախմբվածության և միասնության կոչ արել։
Ընտրված նախագահի հաստատման արարողությունը նախորդում է երդմնակալությանը, որը տեղի կունենա հուլիսի 30-ին Մեջլիսի շենքում (միապալատ խորհրդարան):