Գեղարքունիքի մարզի մի շարք բժշկական հաստատություններ նոր սարքավորումներ և համակարգիչներ են ձեռք բերել

ԳԱՎԱՌ, 23 ՀՈՒԼԻՍԻ, ԱՐՄԵՆՊՐԵՍ։ ՀՀ առողջապահության նախարարությունը «Embrace Global» կազմակերպության աջակցությամբ ձեռք է բերել նորածնային շարժական տաքացնող բնիկների հավաքածու և տրամադրել Գեղարքունիքի մարզպետի աշխատակազմին։ 

Ինչպես «Արմենպրես»-ը տեղեկացավ Գեղարքունիքի մարզպետի աշխատակազմից, դրանք արդեն բաշխվել են Գեղարքունիքի մարզի ծննդօգնություն և նորածնային ինտենսիվ թերապիա իրականացնող Գավառի, Սևանի, Մարտունու, Ճամբարակի, Վարդենիսի բժշկական կենտրոններին և Մարտունու ծննդատանը։ 

Նորածնային շարժական տաքացնող բնիկների ճիշտ կիրառման, պահպանման և խնամքի նպատակով նշված բժշկական կազմակերպությունների համապատասխան մասնագետները կմասնակցեն «Embrace Global» կազմակերպության կողմից Մխիթար Հերացու անվան Երևանի պետական բժշկական համալսարանի «Մուրացան» հիվանդանոցային համալիրում կազմակերպվող վերապատրաստման դասընթացներին։ 

ՀՀ առողջապահության նախարարությունը մեկ այլ ծրագրի շրջանակներում, ՄԱԿ-ի մանկական հիմնադրամի աջակցությամբ, Գեղարքունիքի մարզի մի շարք առողջապահական հիմնարկների կարիքների համար ձեռք է բերել ամբողջը մեկում (Lenovo Thinkcentre Neo) մակնիշի համակարգիչներ։ Դրանք Գեղարքունիքի մարզպետի աշխատակազմի կողմից բաշխվել են Սևանի, Գավառի, Մարտունու, Վարդենիսի բժշկական կենտրոններին, Ակունքի, Գեղհովիտի, Գանձակի, Լիճքի, Լճաշենի առողջության առաջնային պահպանման կենտրոններին, Երանոսի, Զոլաքարի, Ծովինարի, Կարմիրգյուղի, Ձորագյուղի, Ն.Գետաշենի, Նորատուսի, Սարուխանի, Վ. Գետաշենի բժշկական ամբուլատորիաներին և Վարդենիկի առողջության կենտրոններին՝ աշխատանքները տեղում ավելի որակյալ և արդյունավետ կազմակերպելու նպատակով։ 

Խոսրով Խլղաթյան