Podcast- ՀԿԽԸ-ն կանխիկ դրամական աջակցություն կտրամադրի ԼՂՀ-ից բռնի տեղահանվածներին և ջրհեղեղից տուժած ընտանիքներին
4 րոպեի ընթերցում
ԵՐԵՎԱՆ, 16 ՀՈՒԼԻՍԻ, ԱՐՄԵՆՊՐԵՍ: ՀԿԽԸ-ն (Հայկական կարմիր խաչի ընկերությունը) և Հունգարիայի կառավարությունը օրեր առաջ ստորագրեցին հուշագիր, որի համաձայն 500 000 եվրո աջակցություն կտրամադրվի ԼՂՀ-ից բռնի տեղահանվածների կենսապահովման պայմանները բարելավելու համար։
ՀԿԽԸ լրատվության և լուսաբանման բաժնի ղեկավար Արթուր Հովհաննեսյանը «Արմենպրես» փոդքասթի շրջանակում ամփոփեց անցնող ամիսներին կատարված աշխատանքները և ներկայացրեց ներկայիս ծրագրերը: «ՀԿԽԸ-ն մշտապես լինելով պետությանը օժանդակող կառույց, չի կարող անմասն մնալ երկրում տեղի ունեցող ցանկացած իրադարձության հանդեպ, հատկապես երբ առաջնային է մարդու կյանքը։ ՀԿԽԸ-ն այս ընթացքում մեծ ներգործություն է ունեցել ԼՂՀ-ից բռնի տեղահանվածների կենսաապահովման պայմաններն ավելի լավը դարձնելու հարցում։ Մեր շահառուներից ոմանք մեր օգնությամբ արդեն ունեն սեփական բիզնես, ոմանք ստացել են բիզնես կրթություն և ձեռք են բերել նոր մասնագիտություն։ Մեզ համար շատ կարևոր է, բացի նյութական աջակցությունը, ցուցաբերել սոցիալ հոգեբանական աջակցություն, որպեսզի մարդիկ ինտեգրվեն, վերագտնեն խաղաղություն, մոտիվացվեն և շարունակեն գործել նոր միջավայրում»,- նշեց Հովհաննեսյանը։
ՀԿԽԸ ուշադրությունից դուրս չի մնացել Հայաստանի մարզերում մայիս ամսին տեղի ունեցած աղետալի ջրհեղեղից տուժածների խնդիրները։
Մշակվում է 50000 ական դրամ սոցիալական աջակցության ծրագիրը։
«Աղետի առաջին իսկ օրից ՀԿԽԸ-ն մեծ աշխատանքային խմբով մեկնել է Ալավերդի խոշորացված համայնք, որտեղ միացել է այդ պահին գործող աշխատանքային խորհրդին, որը ղեկավարում էր Տարածքային կառավարման և ենթակառուցվածքների նախարար Գնել Սանոսյանը։ Համատեղ գործելով, կատարվել է կարիքի գնահատում և ավելի քան 250 կամավորից բաղկացած մեր թիմով կատարել ենք կոմունիկացիաների վերականգնում, մարդկանց տեղաշարժի ապահովում և առաջին անհրաժեշտության իրերի՝ սնունդ, հիգիենիկ պարագաների բաշխում։ Իսկ այս պահին տվյալների նույնականացման և մշակման վերջին փուլում է , աղետի հետևանքով տուժած, յուրաքանչյուր ընտանիքին կանխիկ 50000 ական դրամ սոցիալական աջակցություն տրամադրելու ծրագիրը»,- մանրամասնեց Հովհաննեսյանը։
Անդրադառնալով վերջերս Հունգարիայի կառավարության և ՀԿԽԸ միջև ստորագրված հուշագրին՝ նա մանրամասնեց․ «Հունգարիայի կառավարության հետ վերջերս սերտ համագործակցություն է ստեղծվել։ Բավականին մեծ և երկարաժամկետ ծրագրերի առաջընթաց կա՝ երկկողմ գործակցությունների հարցում։ Եվ այս ամենի արդյունքում ՀԿԽԸ-ն և Հունգարիայի կառավարությունը վերջերս ստորագրեցին հուշագիր , որի համաձայն 500 000 եվրո աջակցություն է տրամադրվելու ԼՂ-ից բռնի տեղահանվածների կենսապահովման պայմանները բարելավելուն։ Գումարի մի մասն էլ ուղղվելու է ջրհեղեղից տուժած քաղաքացիներին, նորից նույն նշանակությամբ։
Այս պահին ՀԿԽԸ-ն աշխատում է մի շարք ուղղություններով տարբեր գործընկերների հետ, այդ թվում նոր գործընկերների, ովքեր իրենք են համագործակցության հայտ ներկայացրել, որն էլ կարծում եմ վստահության ցուցիչ է»։
Տաթև Զաքարյան
Մանրամասները լսեք փոդքասթում։