BBC-ի ռադիոմեկնաբանի ընտանիքին խաչաղեղով սպանած կասկածյալը ձերբակալվել է
1 րոպեի ընթերցում
![BBC-ի ռադիոմեկնաբանի ընտանիքին խաչաղեղով սպանած կասկածյալը ձերբակալվել է](http://armenpress.am/resized/480/storage/images/articles/2024/07/11/5yPsO8qrAJUZJyzRXoG5HtvMI0lew99k19rXwolG.webp)
ԵՐԵՎԱՆ, 11 ՀՈՒԼԻՍԻ, ԱՐՄԵՆՊՐԵՍ։ Բրիտանիայի ոստիկանությունը հուլիսի 10-ին գտել է BBC-ի հայտնի ռադիոմեկնաբան Ջոն Հանթի կնոջ և երկու դուստրերի սպանության կասկածյալին։ «Արմենպրես»-ի փոխանցմամբ՝ այս մասին հաղորդում է BBC-ն։
26-ամյա Քայլ Քլիֆորդին գտել են հյուսիսային Լոնդոնի գերեզմանատներից մեկի մոտ՝ վիրավոր վիճակում։
61-ամյա Քերոլ Հանթին և նրա 25-ամյա և 28-ամյա դուստրերին գտել էին Հերթֆորդշիրի շրջանի Բուշի քաղաքի իրենց տանը, որտեղ նրանք ստացած վիրավորումներից մահացել էին։ Ըստ իրավապահների՝ հարձակման ընթացքում օգտագործվել է խաչաղեղ և, հնարավոր է, այլ զենքեր։
Ըստ ոստիկանության՝ կասկածյալը կարճ ծառայությունից հետո 2022 թվականին հեռացել էր բրիտանական բանակից։ Ենթադրվում է, որ զոհերը ճանաչել են կասկածյալին, իսկ սպանությունը եղել է թիրախավորված։
CNN-ն իր հերթին նշում է, որ Բրիտանիայում զանգվածային սպանությունները հազվադեպ են, սակայն կանանց նկատմամբ բռնությունը կառավարության կողմից որակվել է որպես ազգային սպառնալիք։ Ըստ վիճակագրության՝ Բրիտանիայում յուրաքանչուր երեք օրվա ընթացքում որևէ տղամարդու կողմից մեկ կին է սպանվում, իսկ յուրաքանչյուր չորրորդ կին իր կյանքում ենթարկվում է ընտանեկան բռնության։