Ռուսաստանը և Ուկրաինան հայտնել են փոխադարձ հարվածների մասին

ԵՐԵՎԱՆ, 16 ՀՈՒԼԻՍԻ, ԱՐՄԵՆՊՐԵՍ։ Ռուսաստանի և Ուկրաինայի իշխանությունները հայտնել են մեկը մյուսի տարածքին հասցրած հարվածների մասին։ 

«Արմենպրես»-ի փոխանցմամբ՝ ՌԴ պաշտպանության նախարարությունը հայտարարել է, որ գիշերը երկրի հակաօդային պաշտպանության ուժերը խոցել են 13 ուկրաինական անօդաչու թռչող սարք Բելգորոդի, Ռոստովի, Կուրսկի և Վորոնեժի մարզերում, ինչպես նաև Սև ծովի ջրատարածքում։

Բելգորոդի նահանգապետը հայտնել է, որ Շեբեկինո քաղաքի և Նովայա Տավոլժանկա գյուղի գնդակոծությունների հետևանքով 4 խաղաղ բնակիչ է վիրավորվել։ Վնասվել են գազի և էլեկտրական հոսանքի մատակարարման գծերը։

Կուրսկի իշխանությունները հաղորդել են, որ ուկրաինական ԱԹՍ-ն հարվածել է մարզում տեղակայված ցածրավոլտ սարքավորումների գործարանին, որտեղ հրդեհ է բռնկվել։ Աշխատակիցներից ոչ ոք չի տուժել։ 

Ռոստովի իշխանությունները հայտնել են մարզի երկնքում 4 ԱԹՍ խոցելու մասին, տուժածներ և ավերածություններ չկան։ 

Իսկ Ուկրաինայի ռազմաօդային ուժերը գիշերը հայտնել են, որ ռուսական ԱԹՍ-ները հարվածներ են հասցնում Ուկրաինայի տարբեր նահանգների։ Ըստ BBC-ի ռուսական ծառայության՝ օդային տագնապի ազդանշան է հայտարարվել Կիևի մարզում, ԱԹՍ-ները շարժվել են նաև Չեռնիգովի և Վիննիցայի մարզերի ուղղությամբ։ 

Իսկ Դոնեցկի մարզում, ըստ «Ուկրաինսկայա պրավդա»-ի, հուլիսի 14-ին ռուսական ուժերի կողմից Միրնոգրադ քաղաքի գնդակոծության հետևանքով փլուզված շենքի փլատակներից հանել են ևս 2 հոգու մարմին։ Այսպիսով, շենքի փլուզման զոհերի թիվը հասել է 3-ի, 6 մարդ վիրավորվել է։