Հիմնանորոգվում է Մարտունի քաղաքի Գարեգին Նժդեհ փողոցը
1 րոպեի ընթերցում
![Հիմնանորոգվում է Մարտունի քաղաքի Գարեգին Նժդեհ փողոցը](http://armenpress.am/resized/480/storage/images/articles/2024/07/02/PGYJYhQ0j3IbsgT9Kr9icFYaDrNRR25AzJQXpLLr.webp)
ԳԱՎԱՌ, 2 ՀՈՒԼԻՍԻ, ԱՐՄԵՆՊՐԵՍ։ Գեղարքունիքի մարզի Մարտունի քաղաքի Գարեգին Նժդեհ փողոցում մեկնարկել են հիմնանորոգման աշխատանքները։
Ինչպես «Արմենպրես»-ը տեղեկացավ Մարտունու համայնքապետարանի աշխատակազմից, այժմ կատարվում են ճանապարհի գրունտի հարթեցման, խճապատման աշխատանքներ, որին կհաջորդի ասֆալտապատումը։ Ճանապարհի հիմնանորոգում նախատեսված էր իրականացնել 2022 թվականին, սուբվենցիոն ծրագրով, սակայն այն տեղափոխվեց հաջորդ տարի՝ փողոցի կոյուղագծերի վերակառուցման անհրաժեշտությունից ելնելով։ Կոյուղագծերի շինարարությունն իրականացվեց 2023 թվականին, պետական բյուջեի միջոցներով՝ 54 մլն դրամի հատկացմամբ։
Փողոցի կոյուղու ցանցի արդիականացման աշխատանքներն արդեն ավարտվել են։
Գարեգին Նժդեհ փողոցի հիմնանորոգման ծրագրի պայմանագրային արժեքը կազմում է 142 մլն դրամ, որի 50 տոկոսը հատկացրել է ՀՀ կառավարությունը, 50 տոկոսը՝ Մարտունու համայնքապետարանը։
Ծրագրով նախատեսվում է ասֆալտապատել 1150 մ երկարություն և շուրջ 10 հազար քմ մակերես ունեցող ճանապարհ։
Շինարարական աշխատանքներն ավարտի կհասցվեն այս տարվա ընթացքում։
Խոսրով Խլղաթյան