Ունենք ընդհանուր ջրաղբյուրների ջրաքանակի 20-30 տոկոս նվազում. Գարեգին Բաղրամյանն անդրադարձել է ջրամատակարարման կրճատումների խնդրին
2 րոպեի ընթերցում
![Ունենք ընդհանուր ջրաղբյուրների ջրաքանակի 20-30 տոկոս նվազում. Գարեգին Բաղրամյանն անդրադարձել է ջրամատակարարման կրճատումների խնդրին](http://armenpress.am/resized/480/storage/images/articles/2024/07/04/lzi8V4pEYoYr8kyg8ZNgnyboaDdTID0CyOIbrgwM.webp)
ԵՐԵՎԱՆ, 4 ՀՈՒԼԻՍԻ, ԱՐՄԵՆՊՐԵՍ։ Երևան քաղաքի ջրանջատումների հարցը կապված է նրա հետ, որ ընդհանուր ջրաղբյուրների ջրաքանակի մոտավորապես 20-30 տոկոս նվազման խնդիր կա, և այդ հարցի լուծման համար քննարկվում է քաղաք լրացուցիչ ջրաքանակ հասցնելու հնարավորության ստեղծումը։
«Արմենպրես»-ի հաղորդմամբ՝ Կառավարության նիստից հետո լրագրողների հետ ճեպազրույցի ընթացքում այս մասին հայտնել է Հանրային ծառայությունները կարգավորող հանձնաժողովի նախագահ Գարեգին Բաղրամյանը։
Վերջինս, անդրադառնալով մայրաքաղաքում հաճախակի ջրանջատումների մասին հարցին, նշել է, որ դրանք ոչ թե ջրանջատումներ են, այլ իրականացվում են գրաֆիկի փոփոխություններ:
Նա նաև հավելել է, որ կարող են լինել քաղաքի հատվածներ, որտեղ ջրամատակարարման ժամերը կկրճատվեն․ «Օրինակ՝ 24 ժամյա ջրամատակարարումը նվազեցվի և դառնա 19 կամ 17 ժամ։ Կա նաև մի մեծ, գլոբալ խնդիր, որ ընդհանուր ջրաղբյուրների ջրաքանակի մոտավորապես 20-30 տոկոս նվազում ունենք, և այդ հարցերն էլ քննարկվում են հիմա՝ այլ ջրաքանակներով կամ լրացուցիչ ջրաքանակ քաղաք հասցնելու հնարավորություն ստեղծելու ուղղությամբ»,- ասել է Բաղրամյանը:
Անդրադառնալով օրեր շարունակ բնակիչներին ջուր չմատակարարելու մասին հարցին՝ Գարեգին Բաղրամյանը նկատել է, որ բնակչությանը 3 օր ջուր չտրամադրելը խախտում է համարվում, և այդ դեպքում տրամադրող ընկերությունը խախտում է կանոնները։