Քաղաքագետ Ներսես Կոպալյանը Բրյուսելում ներկայացրել է Հայաստանի անվտանգային հարցերն ու մարտահրավերները

ԲՐՅՈՒՍԵԼ, 28 ՀՈՒՆԻՍԻ, ԱՐՄԵՆՊՐԵՍ։ Նեվադայի համալսարանի պրոֆեսոր, քաղաքագետ Ներսես Կոպալյանը Բրյուսելում դիվանագիտական եւ ակադեմիական շրջանակների հետ քննարկել է Հայաստանի անվտանգության, մարտահրավերների եւ արտաքին քաղաքականության վերաբերյալ հարցեր։ 

Բրյուսելում «Արմենպրես»-ի թղթակցի փոխանցմամբ, քաղաքագետը հանդիպում է ունեցել Բելգիայի միջազգային հարաբերությունների թագավորական Էգմոնտ ինստիտուտում։ Հանդիպում քննարկումը վարել է ինստիտուտի տնօրեն Պոլ դը Վիտտեն, որին ներկա էին գիտնականներ, դիվանագետներ։ 

Կոպալյանը հանդիպման ընթացքում նշել է, որ Հայաստանի՝ Արևմուտքին մոտենալու եւ Ռուսաստանից անջատվելու քաղաքականության հետեւանքով Հարավային Կովկասը ենթարկվել է աշխարհաքաղաքական բազմակարծության, որտեղ այլեւս մեկ հեգեմոն ուժ չի գերակայում, այլ դերակատարների մի ամբողջ հավաքածու պայքարում է՝ առաջ տանելու համար իր շահերը տարածաշրջանում։ 

«ԵՄ-ն գերիշխող դերակատարներից մեկն է, որը ֆունկցիոնալ դաշինք կազմելով Միացյալ Նահանգների հետ, փորձում է անդրատլանտյան հենակետ ապահովել տարածաշրջանում։ Հայաստանն ու ԵՄ-ն տարածաշրջանում կայունացման են ձգտում՝ եվրոպական ինստիտուցիոնալ գործիքակազմի և դիվանագիտական ​​ներգրավվածության միջոցով», - նշել է քաղաքագետը՝ ընդգծելով որ ԵՄ-Հայաստան ռազմավարական շահերի ընդլայնման գործում ռուս-ադրբեջանական առանցքը փորձել է խոչընդոտել տարածաշրջանում աճող անդրատլանտյան ներկայությանը։ 

Քաղաքագետ Կոպալյանը հանդիպել է նաեւ ԵՄ-ում հավատարմագրված մի շարք դիվանագետների, անդամ պետությունների մշտական ներկայացուցիչների, Եվրոպական Միության կառույցների աշխատակազմի անդամների եւ Հայաստանի հարցերով պատասխանատու պաշտոնյաների հետ։ Կոպալյանը ներկայացրել է Հայաստանի արտաքին քաղաքականությունը, մարտահրավերները, դրանց դիմակայելու ուղղությամբ Հայաստանի ձեռնարկած քայլերը, Հայաստան-ԵՄ եւ Հայաստան-ԱՄՆ հարաբերությունների վերջին զարգացումներն ու դրանք առաջ տանելու հետեւողական աշխատանքները։ 

ԼԻԼԻԹ ԳԱՍՊԱՐՅԱՆ