Լուսակունքում 2023 թվականին սուբվենցիոն 3 ծրագիր է իրականացվել
3 րոպեի ընթերցում
![Լուսակունքում 2023 թվականին սուբվենցիոն 3 ծրագիր է իրականացվել](http://armenpress.am/resized/480/storage/images/articles/2024/06/20/jeQhCG6tBXs50zeASxudwMPQBbrFSLy9q4EZwgKs.webp)
ԳԱՎԱՌ, 20 ՀՈՒՆԻՍԻ, ԱՐՄԵՆՊՐԵՍ։ Գեղարքունիքի մարզի Վարդենիս համայնքի Լուսակունք գյուղում ՀՀ կառավարության կողմից 2023 թվականին իրականացվող սուբվենցիոն ծրագրերի շրջանակներում կառուցվել է 1 խմելու և 2 ոռոգման ջրատար ցանցեր, հիմնանորոգվել հեղեղատարի հունը։
Ինչպես «Արմենպրես»-ը տեղեկացավ Վարդենիսի համայնքապետարանի աշխատակազմից, Լուսակունքում 2023 թվականին իրականացված սուբվենցիոն 3 ծրագրերի համար ներդրվել է 111 միլիոն 154 հազար դրամ, որից 77 միլիոն 807 հազար 800 դրամը ՀՀ կառավարության, 33 միլիոն 347 հազար դրամը Վարդենիսի համայնքապետարանի մասնաբաժինն է։
Լուսակունքի խմելու ջրատարի արտաքին ցանցի կառուցման ծրագրի պայմանագրային արժեքը կազմում է 22 միլիոն 800 հազար դրամ, որի 70 տոկոսը հատկացրել է ՀՀ կառավարությունը, 30 տոկոսը՝ Վարդենիսի համայնքապետարանը։
Ծրագրի իրականացման արդյունքում կառուցվել է 1745 մետր երկարության խմելու ջրատարի արտաքին ցանց, որից 610 մետրը՝ մետաղական, 1135 մետրը՝ պոլիէթիլենային խողովակներով։
Շինարարական աշխատանքները մեկնարկել են 2023 թվականի սեպտեմբերի 9-ից և ավարտվել նույն տարվա հոկտեմբերին։
Ծրագրի իրականացման շնորհիվ Լուսակունքի «Կազովնի» թաղամասի 40 տնտեսություն օգտվում են շուրջօրյա ու որակյալ ջրամատակարարումից։
Լուսակունքի ոռոգման ջրատար ցանցի կառուցման պայմանագրային արժեքը կազմում է 54 միլիոն 154 հազար դրամ, որի 70 տոկոսը հատկացնում է ՀՀ կառավարությունը, 30 տոկոսը՝ Վարդենիսի համայնքապետարանը ։
Ծրագրի իրականացման արդյունքում կառուցվել է 608 մետր երկարության ոռոգման ջրատար՝ երկաթբետոնյա կիսախողովակներով և բետոնապատման միջոցով հիմնանորոգվել հեղեղատարի քայքայված հատակը՝ 380 մետր երկարությամբ։
Շինարարական աշխատանքները սկսվել են 2023 թվականի օգոստոսին և ավարտվել նույն տարվա նոյեմբերի վերջերին։
Աշխատանքներն իրականացրել են «Կոթաշին» ՍՊԸ շինարարները։ Ծրագրի շահառու են հանդիսանում 150 տնտեսություն։
Լուսակունքի ոռոգման ջրատար ցանցի վերակառուցման ծրագրի պայմանագրային արժեքը կազմում է 34 միլիոն 200 հազար դրամ, որի 70 տոկոսը հատկացնում է ՀՀ կառավարությունը, 30 տոկոսը՝ Վարդենիսի համայնքապետարանը։
Ծրագրով նախատեսված է ոռոգման ջրատարի կառուցում 469 մետր երկարությամբ, երկաթյա խողովակներով եւ կիսախողովակներով։
Շինարարական աշխատանքները մեկնարկել են 2023 թվականի սեպտեմբերից և ավարտվել նույն տարվա հոկտեմբերին։ Ոռոգման ջրատարի 430 մետրը կառուցվել է երկաթյա բաց կիսաղովակներով, 39 մետրը՝ փակ խողովակներով։
Աշխատանքներն իրականացրել են «Ավետիսյան Շինմոնտաժ» ՍՊԸ շինարարները։
Ծրագրի շահառու են հանդիսանում Լուսակունքի տնտեսությունների մեծ մասը։
Վերջին երկու ծրագրերի իրականացման արդյունքում 2024 թվականի ոռոգման շրջանից արդեն ջուրը տնտեսություններին կմատակարարվի ժամանակին և անկորուստ։
Խոսրով Խլղաթյան