Տոլմա, թե խինկալի․ Դիլիջանում կանցկացվի «Միմինո» հայ-վրացական փառատոնը՝ համախմբելով երկու երկրների խոհարարներին

ԵՐԵՎԱՆ, 19 ՀՈՒՆԻՍԻ, ԱՐՄԵՆՊՐԵՍ։ Տոլմա՞, թե՞ խինկալի, միսն ավելի համեղ է խաղողի տերևի՞, թե՞ խմորի մեջ փաթաթած։ Կես կատակ, կես լուրջ այսպիսի քննարկումներ են ունենում հայ և վրացի խոհարարները կարևորագույն փառատոնին պատրաստվելիս։ Հունիսի 22-ին արդեն 2-րդ անգամ Դիլիջանում անցկացվելու է հայ-վրացական խոհանոցային ու մշակութային կոլորիտն ապահովող «Միմինո» փառատոնը։ Այն մեկ հարկի տակ համախմբելու է Հայաստանի ու Վրաստանի խոհարարներին, որոնք մրցելու են իրենց խոհարարական հմտություններով։ Պրոֆեսիոնալ ժյուրին էլ գնահատելու է նրանց աշխատանքը։ «Արմենպրես»-ի մամուլի սրահում հրավիրված ասուլիսում «Հայ խոհարարական ավանդույթների զարգացման և պահպանման» հասարակական կազմակերպության նախագահ Սեդրակ Մամուլյանը նշեց, որ խոհարարներն ազատ են լինելու ստեղծագործելու հարցում։ 

«Հայաստանի խոհարարները պատրաստելու են հիմնականում Տավուշին բնորոշ, վրացական կողմն՝ իր նախընտրած կերակրատեսակները։ Առանձնացվելու են տոլման ու խինկալին։ Ընդհանուր առմամբ, մենք նպատակ ունենք ցույց տալու մեր ուտեստների ընդհանրություններն ու առանձնահատկությունները, դրանք ճանաչելի դարձնել լայն հանրությանը»,-ասաց Սեդրակ Մամուլյանը։ 

Փառատոնի շրջանակում 45 տաղավարում առանձին-առանձին կներկայացվեն ինչպես հայ-վրացական խոհանոցի ուտեստները, այնպես էլ տեղի բնակիչները հնարավորություն կունենան վաճառելու գյուղական բերքն ու բարիքը, ձեռքի աշխատանքը։ Տոնական մթնոլորտն ամբողջացնելու համար իրենց կատարումներով հանդես կգան Հայաստանի ու Վրաստանի պարային խմբերը, երգիչները։ Համերգային ծրագրով կներկայանա «Նեմրա» խումբը։ Տուրիզմի hայկական ֆեդերացիայի նախագահ Մեխակ Ապրեսյանը նշեց, որ բավական հետաքրքիր ծրագիր է լինելու և բոլոր ցանկացողներ կարող են այցելել։ 

«Այս փառատոնը տարածաշրջանային նշանակության ինքնատիպ զբոսաշրջային փառատոն է։ Այն հարթակ է, որտեղ ներկայացվում է երկու երկրների մշակույթը, խոհանոցային առանձնահատկությունները։ Այն մի շարք խնդիրներ է լուծում՝ դիվերսիֆիկացնել հայկական զբոսաշրջային արդյունքը, ունենալ տարածաշրջանային մրցունակ տուրիստական պրոդուկտ, ինչպես նաև ներկայանալ որպես անվտանգ ու գրավիչ երկիր»,-ասաց Մեխակ Ապրեսյանը։ 

Զբոսաշրջության կոմիտեի առաջնահերթություններից է զբոսաշրջության ակտիվացմանը նպաստող նախաձեռնություններին աջակցելը։ Կոմիտեի մարքեթինգի և խթանման վարչության պետ Դիանա Կարապետյանը տեղեկացրեց, որ այս տարի աջակցման ծրագրում 12 փառատոն կա։ 

«Նման փառատոնների անցկացումը շատ կարևոր է, դրանք նպաստում են Հայաստանի մարզերում, համայնքներում զբոսաշրջության ու տարածքային ու տնտեսական համաչափ զարգացմանը»,-ասաց Դիանա Կարապետյանը։ 

Ընթացիկ տարվա հունվար-մայիս ամիսներին Հայաստան է այցելել 765 000 զբոսաշրջիկ։ Նրանց մեծ մասը Ռուսաստանից է, որին հաջորդում է Վրաստանը, Իրանը։ Այս տարի ակտիվություն է նկատվում նաև Արաբական Միացյալ Էմիրություններից, Հնդկաստանից։