Գյումրիում շահագործման հանձնվեց «Հայաստան» համահայկական հիմնադրամի կառուցած երկու նորակառույց բնակելի շենք
3 րոպեի ընթերցում
![Գյումրիում շահագործման հանձնվեց «Հայաստան» համահայկական հիմնադրամի կառուցած երկու նորակառույց բնակելի շենք](http://armenpress.am/resized/480/storage/images/articles/2024/06/13/rFSzJhXJG5jQGG2yOX9tR1VuujXtBQBXqylOjzyd.webp)
ԳՅՈՒՄՐԻ, 13 ՀՈՒՆԻՍԻ, ԱՐՄԵՆՊՐԵՍ: Գյումրի քաղաքի «Մուշ-2» թաղամասում (Կ․ Հալաբյան փ. 1), տեղի ունեցավ «Հայաստան» համահայկական հիմնադրամի կողմից կառուցված երկու նորակառույց բնակելի շենքի բացման արարողությունը: Բացմանը ներկա էին ՀՀ նախագահ Վահագն Խաչատուրյանը, «Հայաստան» համահայկական հիմնադրամի ներկայացուցիչներ, սփյուռքից ժամանած հատուկ հյուրեր և պաշտոնատար անձինք: Ինչպես տեղեկացնում է «Արմենպրես»-ը, «Մեր Գյումրի» ծրագրի շրջանակում կառուցվող բազմաբնակարան շենքերը կառուցվել են «Հայաստան» համահայկական հիմնադրամի ֆինանսավորմամբ և Հայ առաքելական եկեղեցու Հյուսիսային Ամերիկայի Արևմտյան թեմի աջակցությամբ: Կահավորումն ու կենցաղային տեխնիկայով ապահովվումն իրականացվել է ԱԿԲԱ բանկի Վիզա-Բարերար քարտապանների ֆինանսավորմամբ:
«Իրականում այն, ինչ տեղի է ունենում հիմա, շատ ավելի վաղ պետք է տեղի ունենար. մենք 1988 թվականի հետևանքները վաղուց պետք է լուծած լինեինք, բայց, քանի դեռ կան տնակներ, բոլորս պարտավորություն ունենք այդ ամենը լրացնել: Ուզում եմ շնորհակալություն հայտնել բոլոր նրանց, ովքեր օգնել են հիմնադրամին իրականություն դարձնել մարդկանց վաղեմի երազանքը»,-շնորհավորելով բոլորին՝ նշեց նախագահ Վահագն Խաչատուրյանը:
«2019 թվականին անօթևանների խնդրի լուծման գաղափարը վերափոխվեց թաղամաս ստեղծելու գաղափարի, որտեղ մարդիկ կապրեն միասին, կստեղծագործեն միասին և դրա հիմքում դրվեց նաև արվեստ: Շենքերը կառուցելով՝ փորձել ենք դնել բովանդակություն՝ ստեղծելով արվեստ ու մշակույթ»,-իր խոսքում նշեց «Հայաստան» համահայկական հիմնադրամի տնօրեն Հայկակ Արշամյանը՝ շնորհակալություն հայտնելով բոլոր նրանց, ում շնորհիվ կառուցվել են շենքերը:
1988 թվականի դեկտեմբերի 7-ի ավերիչ երկրաշարժի հետևանքով տնակներում բնակվող անօթևան ընտանիքների կացարանային խնդիրները մշտապես եղել են հիմնադրամի ուշադրության կենտրոնում: Հիմնադրամը աղետալի երկրաշարժից հետո Գյումրիում կառուցել է 50 շենք՝ բնականով ապահովվելով ավելի քան 500 ընտանիքի: 2015 թվականից սկսած հիմնադրամը բնակարաններ է գնել ու նվիրաբերել տնակներում բնակվող 45 ընտանիքի:
2019 թվականին մեկնարկեց «Մեր Գյումրի» ծրագիրը, որի շրջանակներում արդեն 2022 թվականին շահագործման հանձնվեց 2 շենք՝ ընդհանուր 36 բնակարանով, 50 երեխայի համար նախատեսված մանկապարտեզով և 2 արվեստանոցով։
Արմենուհի Մխոյան