2 րոպեի ընթերցում
ԵՐԵՎԱՆ, 25 ՀՈւՆՎԱՐԻ, ԱՐՄԵՆՊՐԵՍ: Իրանն ու Թուրքիան տասը փաստաթուղթ են ստորագրել համագործակցության շուրջ` առևտրատնտեսական հարաբերությունների զարգացման նպատակով: «Արմենպրես»-ի փոխանցմամբ՝ այս մասին հաղորդում է IRNA գործակալությունը:
Ստորագրման արարողությունը տեղի է ունեցել հունվարի 24-ին Անկարայում՝ Իրանի նախագահ Էբրահիմ Ռայիսիի և նրա թուրք պաշտոնակից Ռեջեփ Թայիփ Էրդողանի ներկայությամբ։
Համագործակցության համաձայնագրերն ընդգրկում են տարբեր բնագավառներ, ինչպիսիք են երկաթուղին, էներգետիկան, համատեղ առևտրային գոտիները և կապը:
Ռայիսին և Էրդողանը հանդիպման ժամանակ քննարկել են, այդ թվում, տարածաշրջանային զարգացումները, հատկապես՝ Գազայի հատվածում Իսրայելի պատերազմի հետևանքները, ինչպես նաև այն քայլերը, որոնք կարող են ձեռնարկվել երկկողմ հարաբերությունների հետագա ամրապնդման համար:
Առանձնազրույցից հետո երկու երկրների նախագահները մասնակցել են նաև Իրանի և Թուրքիայի առևտրատնտեսական համագործակցության բարձրագույն խորհրդի ութերորդ նստաշրջանին, որտեղ նրանք պայմանավորվել են ընդլայնել համագործակցությունը նաև տնտեսության, անվտանգության, քաղաքականության և մշակույթի ոլորտներում։
Մամուլի ասուլիսում նախագահ Ռայիսին հայտարարել է, որ Իրանն ու Թուրքիան ունեն զգալի ներուժ, որը կարելի է օգտագործել բոլոր բնագավառներում հարաբերությունների զգալի ընդլայնման համար։
Ինչպես ավելի վաղ հայտնել էր «Արմենպրես»-ը, երկու նախագահները նաև համատեղ հայտարարություն են տարածել՝ ընդգծելով կովկասյան տարածաշրջանի երկրների տարածքային ամբողջականությունը հարգելու անհրաժեշտությունը, իսկ 3+3 երկխոսության մեխանիզմը գնահատելով որպես անդամ երկրների միջև խորհրդակցությունների և կառուցողական համագործակցության հարմար հարթակ։