Եվրոպայի խորհրդի աջակցությամբ ՀՀ ՆԳՆ-ն զարգացնում է կարողություններն ընտանեկան բռնության դեմ պայքարի ոլորտում

ԵՐԵՎԱՆ, 18 ԴԵԿՏԵՄԲԵՐԻ, ԱՐՄԵՆՊՐԵՍ: «Կանանց նկատմամբ բռնության հաղթահարումը և գենդերային հավասարության ամրապնդումը Հայաստանում» ծրագրի շրջանակներում դեկտեմբերի 15-16-ը Ծաղկաձորում անցկացվել է վերապատրաստման դասընթաց, որին մասնակցել են ՆԳ նախարարության ոստիկանության տարածքային ստորաբաժանումների ղեկավարները։ Դասընթացը կազմակերպվել էր Եվրոպայի խորհրդի երևանյան գրասենյակի կողմից։

Ինչպես «Արմենպրես»-ին տեղեկացրին ՀՀ ներքին գործերի նախարարությունից, բացման խոսքով հանդես են եկել Երևանում Եվրոպայի խորհրդի գրասենյակի ծրագրի ղեկավար Լիանա Ամիրբեկյանն ու ՆԳ նախարարության ոստիկանության անչափահասների հանցավորության և ընտանիքում բռնության կանխարգելման վարչության պետ, ոստիկանության գնդապետ Էդգար Պետրոսյանը։

Նա անդրադարձել է կանանց նկատմամբ բռնության և ընտանեկան բռնության կանխարգելման հիմնախնդիրներին և այդ ուղղությամբ իրականացվող միջոցառումներին։ Խոսելով թեմայի կարևորության մասին՝ նա ընդգծել է նմանօրինակ հանդիպումների անհրաժեշտությունը, ինչը լավ հնարավորություն է ամրապնդելու շահագրգիռ կողմերի կարողությունները։

Ըստ աղբյուրի՝ Երևանում Եվրոպայի խորհրդի գրասենյակի ծրագրի ղեկավար Լիանա Ամիրբեկյանն իր ելույթում անդրադարձել է Ծրագրի շրջանակում իրավապահ մարմինների, ոլորտային մասնագետների հետ ունեցած քննարկումներին և համատեղ իրականացված աշխատանքներին։ Նա ընդգծել է պարբերաբար անցկացվող վերապատրաստումների կարևորությունը՝ նշելով նախորդ տարի ծառայողների հետ ունեցած դասընթացների արդյունավետության մասին։

Դասընթացի ընթացքում բանախոսները՝ ՀՀ վերաքննիչ քրեական դատարանի դատավոր Արսեն Նիկողոսյանը, ՀՀ վճռաբեկ դատարանի դատավոր Լիզա Գրիգորյանը և «Կանանց աջակցման կենտրոն» հասարակական կազմակերպության ներկայացուցիչ Զարուհի Մեժլումյանը ներկայացրել են կանանց նկատմամբ բռնության և ընտանեկան բռնության հիմնական պատճառները, անդրադարձել հետևանքներին ու ձևավորված կարծրատիպային ընկալումներին։

ՀՀ ՆԳՆ տեղեկացմամբ՝ երկօրյա վերապատրաստման ընթացքում խնդիրների վերացմանն ուղղված հարցերի շուրջ ծավալվել է առարկայական քննարկում։