Վայք քաղաքում բախված ավտոմեքենաներից մեկն այրվել է, վարորդը հոսպիտալացվել է

ԵՐԵՎԱՆ, 17 ԴԵԿՏԵՄԲԵՐԻ, ԱՐՄԵՆՊՐԵՍ: Վայոց ձորի մարզային փրկարարական վարչության ճգնաժամային կառավարման կենտրոնը դեկտեմբերի 17-ին, ժամը 08:57-ին ահազանգ է ստացել, որ Վայք քաղաքի Ջերմուկի խճուղում այրվում է ավտոմեքենա, կա տուժած․ անհրաժեշտ է փրկարարների օգնությունը:

Ինչպես «Արմենպրես»-ին տեղեկացրին ՀՀ ներքին գործերի նախարարության փրկարար ծառայությունից, դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։

«Պարզվել է, որ Երևան-Մեղրի ավտոճանապարհի 137-րդ կմ-ին բախվել են «Land Rover» (վարորդ՝ Գ. Գ.) և «Mercedes-Benz» (վարորդ՝ Գ. Հ., ծնված՝ 1985 թ․) մակնիշների ավտոմեքենաները. «Mercedes-Benz» մակնիշի ավտոմեքենայում հրդեհ է բռնկվել, վարորդը ստացել է մարմնական վնասվածքներ և արգելափակվել»,- ասվում է հաղորդագրության մեջ։

Ըստ աղբյուրի՝ փրկարարները արգելափակումից դուրս են բերել «Mercedes-Benz» մակնիշի ավտոմեքենայի վարորդին և մոտեցրել շտապօգնության ավտոմեքենային. տուժածը հոսպիտալացվել է բժշկական կենտրոն, որտեղ բժիշկները նրա առողջական վիճակը գնահատել են կայուն ծանր։

Նշվում է, որ հրդեհը մեկուսացվել է ժամը 09։11-ին, մարվել՝ 09։20-ին: Այրվել են ավտոմեքենայի սրահը և բեռնախցիկը։