Որևէ ազդակ չկա, որ Ադրբեջանը հրաժարվել է իր պարտավորությունից. Խանդանյանը՝ գերիների վերադարձի մասին

ԵՐԵՎԱՆ, 13 ԴԵԿՏԵՄԲԵՐԻ, ԱՐՄԵՆՊՐԵՍ։ Տրամաբանությունն ու ընկալումն այն է, որ շատ մոտ ժամանակահատվածում պետք է տեղի ունենա 32 հայ գերիների վերադարձի գործընթացը։ Ինչպես տեղեկացնում է «Արմենպրես»-ը, ԱԺ-ում լրագրողների հետ ճեպազրույցում ասաց ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը՝ պատասխանելով հարցին, թե ի՞նչու է ուշանում 32 հայ գերիների վերադարձը, արդյո՞ք խնդիրներ են առաջացել և Ադրբեջանը հետ է կանգնել նախապես արված հայտարարությունից։

«Նախ չէի ուզենա կոնկրետ ժամկետներ նշել։ Տրամաբանությունն ու ընկալումն այն է, որ շատ մոտ ժամանակահատվածում պետք է տեղի ունենա գործընթացը։ Որևէ ազդակ չկա, որ Ադրբեջանը հրաժարվել է իր պարտավորությունից։ Ի վերջո, դա գրավոր ստանձնած պարտավորություն է, ներկա ժամանակով արված, որ Ադրբեջանը վերադարձնում է 32 գերիներին։ Ենթադրում եմ, որ կան որոշակի կազմակերպչական հարցեր, որոնք ընթացքի մեջ են և մենք պետք է ակնկալենք, որ մոտակա ժամանակահատվածում դա տեղի կունենա»,- ասաց Խանդանյանը։

Դեկտեմբերի 7-ին Հայաստանի Հանրապետության վարչապետի աշխատակազմը և Ադրբեջանի Հանրապետության նախագահի վարչակազմըհրապարակել են համատեղհայտարարություն։

Հայաստանի Հանրապետության վարչապետի աշխատակազմի և Ադրբեջանի Հանրապետության նախագահի վարչակազմի միջև բանակցությունների արդյունքում պայմանավորվածություն է ձեռք բերվել, որ Ադրբեջանի Հանրապետությունն ազատ է արձակում 32 հայ զինծառայողի, իսկ Հայաստանի Հանրապետությունն իր հերթին ազատ է արձակում 2 ադրբեջանցի զինծառայողի։