Ավազակոպճային խառնուրդի ապօրինի արդյունահանմամբ պետությանը պատճառվել է առանձնապես խոշոր վնաս
2 րոպեի ընթերցում
![Ավազակոպճային խառնուրդի ապօրինի արդյունահանմամբ պետությանը պատճառվել է առանձնապես խոշոր վնաս](http://armenpress.am/resized/480/static/news/b/2023/12/1125890.jpg)
ԵՐԵՎԱՆ, 8 ԴԵԿՏԵՄԲԵՐԻ, ԱՐՄԵՆՊՐԵՍ: Քրեական ոստիկանության գլխավոր վարչության ֆինանսավարկային և մտավոր սեփականության ոլորտում կատարվող հանցագործությունների դեմ պայքարի բաժնում ստացված տեղեկությունների հիման վրա իրականացված ստուգողական գործողությունների արդյունքում փաստական տվյալներ են ձեռք բերվել, որ սահմանափակ պատասխանատվությամբ ընկերություններից մեկի տնօրինությունը կամ իրավասու անձինք, առանց հատուկ թույլտվության, Սիս բնակավայրի՝ ընկերությանը պատկանող տարածքներից մեկում ձկնաբուծարան կառուցելու պատրվակով նոյեմբերի սկզբից մինչ օրս իրականացրել են ապօրինի ընդերքօգտագործում։ Ինչպես «Արմենպրես»-ին տեղեկացրին ՀՀ ներքին գործերի նախարարության ոստիկանությունից, արդյունքում՝ ապօրինի արդյունահանվել է շուրջ 510 բեռնատար ավազակոպճային խառնուրդ, տեղափոխվել ընկերությանը պատկանող ավազի լվացման և տեսակավորման կետ, ապա իրացվել տարբեր ընկերությունների՝ պետությանը պատճառելով առանձնապես խոշոր չափերի՝ 15 միլիոն դրամից ավելի վնաս։
Ըստ աղբյուրի՝ առերևույթ հանցանքի մասին կազմված հաղորդումն ու կից փաստաթղթերն ուղարկվել են Քննչական կոմիտե՝ քրեական վարույթ նախաձեռնելու հարցը որոշելու:
Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: