Աղքատությունը հաղթահարելու ճանապարհը միայն ու միայն աշխատանքն է․ վարչապետ

ԵՐԵՎԱՆ, 16 ՆՈՅԵՄԲԵՐԻ, ԱՐՄԵՆՊՐԵՍ։ Հայաստանում 2022 թվականին աղքատությունը 2021 թվականի համեմատ կրճատվել է՝ 26,5 տոկոսից դառնալով 24,8 տոկոս, ծայրահեղ աղքատությունը 1,5 տոկոսից դարձել է 1,2 տոկոս։ «Արմենպրես»-ի հաղորդմամբ՝ Ազգային ժողովի հերթական նիստում այս մասին ասաց Նիկոլ Փաշինյանը՝ ներկայացնելով «Հայաստանի Հանրապետության 2024 թվականի պետական բյուջեի մասին» օրենքի նախագիծը։

«Մենք չենք կարծում, որ գոյացող միլիարդները պետք է բաժանենք ժողովրդին, որ նրանք աղքատությունը հաղթահարեն։ Ո՛չ, մենք պետք է աշխատելու հնարավորություն ստեղծենք և յուրաքանչյուրը պետք է իմանա, որ աղքատությունը հաղթահարելու ճանապարհը միայն ու միայն աշխատանքն է, որովհետև մարդուն կարելի է մեկ օր հաց տալ, մեկ շաբաթ կարելի է հաց տալ, մեկ տարի կարելի է հաց տալ, հինգ տարի կարելի է հաց տալ, բայց մարդուն պատրաստել նրան, որ չես աշխատելու, որ կառավարությունը և հանրությունը քեզ ամբողջ կյանքը կերակրելու է՝ դա նրա նկատմամբ ամենամեծ նվաստացումն և վիրավորանքն է։ Ավելի մեծ վիրավորանք մարդու նկատմամբ չի կարելի պատկերացնել։ Աղքատությունը հաղթահարում են աշխատանքի միջոցով»,- ընդգծեց Փաշինյանը։