388.4
ԼՂ-ից բռնի տեղահանված ավելի քան 80 հազար անձ արդեն ստացել է միանվագ դրամական աջակցություն
2 րոպեի ընթերցում
ԵՐԵՎԱՆ, 17 ՀՈԿՏԵՄԲԵՐԻ, ԱՐՄԵՆՊՐԵՍ։ Լեռնային Ղարաբաղից բռնի տեղահանված ավելի քան 80 հազար անձի արդեն վճարվել է ՀՀ կառավարության կողմից նախատեսված միանվագ դրամական աջակցության գումարը։
«Արմենպրես»-ի հաղորդմամբ՝ այս մասին «Հումանիտար կենտրոն»-ում ասուլիսի ժամանակ ասել ՀՀ Աշխատանքի և սոցիալական հարցերի նախարար Նարեկ Մկրտչյանը։
«Թեպետ նախորդ շաբաթ նախատեսված էր, որ այդ վճարումը պետք է իրականացվել շուրջ 60 հազար մարդու, բայց տվյալների նույնականացումը ավելի արագ տեղի ունեցավ և մենք կարողացանք 80 հազար մարդու վճարել»,-հավելել է նախարարը։
Նրա խոսքով՝ ԼՂ-ից բռնի տեղահանված երեխաներին ևս 100 հազար դրամի չափով միանվագ դրամական աջակցություն տրամադրելու համար ստացվել է շուրջ 27 հազար 300 դիմում։
«Նախորդ շաբաթ արդեն իսկ կարողացել ենք վճարել 14 հազար 593 երեխայի համար։ Այս պահի դրությամբ մնացած դիմումները գտնվում են մշակման փուլում և առաջիկա օրերին կկարողանանք նաև նրանց վճարել»,-մանրամասնել է Մկրտչյանը՝ նշելով, որ կվճարվի ԼՂ-ի բռնի տեղահանված այն բոլոր հայրենակիցների միանվագ դրամական աջակցությունը, որոնք չունեին բանկային քարտեր։
Գերատեսչության ղեկավարի տեղեկատվությամբ՝ նախորդ վճարման ընթացքում վճարվել է ավելի քան 4000 նոր քարտապանների։ Նոր տվյալները Կենտրոնական բանկից ստանալուն պես, շաբաթական կտրվածքով կիրականացվի տվյալների մշակումը, որից հետո նաև վճարումը։
Բաժանորդագրվեք մեր ալիքին Telegram-ում
